Бунагьру багъишла битавриясса хIадисру

Ва макьалалуву бусанну бунагьирттая марцI хьуншиврул дуккайсса цаппара дуаь-азкардая

Чаклил хъирив азкарду

МухIаммад Идавсил [саллаллагьу аьлайгьи ва саллям] увкуну бур»

Гьарца чаклил хъирив 33-ва «СубхIана-Ллагь», 33-ва «Аль-хIамду-ли-Ллягь», 33-ва «Аллагьу акбар» увкуну, хъирив «Ля илягьа илля-Ллагьу, вахIдагьу ля шарика лягьу, лягьуль-мульку ва лягьуль-хIамду ва гьува аьля кулли шайин кьадир» учирча, мунал бунагьру Аллагьнал багъишла битантIиссар, хьхьиривусса хьама кунма чIявусса бухьурчагу» (Муслим).

Кьинилун 100 зикри

ХIадисраву куну бур:

«Гьарца кьини 100-ва вай махъру учайманан буссар чири ацIа лагъ тархъан увссаксса, ттуршва хъинбала бувссаксса, га кьини щяйтIаннуя урувччуну икIантIиссар, ттуршвахъул бунагь багъишла битантIиссар, мунияр хъинсса давугу дакъассар, так вай махъру ххишаласса учаву бакъасса. Ми махъругу: «Ля илягьа илля-Ллагьу, вахIдагьу ля шарика лягьу, лягьуль-мульку ва лягьуль-хIамду ва гьува аьля кулли шайин кьадир» (Аль-Бухари, Муслим).

Аьркин бакъасса калам барча

Идавсил [саллаллагьу аьлайгьи ва саллям] увкуссар:

«Ца мажлисраву щяивкIун ссанчIав бакъасса ихтилатру бувманал гичча изаннин вай махъру учирча, мунал кIулну ягу къакIулну бувсса бунагьру багъишла битантIиссар: «СубхIанака Аллагьумма ва бихIамдика, ашгьаду ан ля илягьа илля анта, астагъфиру-ка ва ату́бу иляйка» (Тирмизи).

Акбар учайхту

Сяъд бин Абу-Вакьаслул бувсун бур укунсса хIадис:

«Идавсил [саллаллагьу аьлайгьи ва саллям] увкуна: "Мизитрава азан (акбар) тIий баяйхту "Ашгьаду ан ля́ илягьа илля-Ллагьу вахIдагьу ля шарика лягьу ва ашгьаду анна МухIаммадан аьбдугьу ва расулюгьу. Радзиту би-Ллягьи раббан ва би-МухIаммадин расулян ва биль-ислями динан" учирча, мунал бунагьру Заннал багъишла битантIиссар"» (Муслим).

Чаклин биссаву

Абу Гьурайрал бувсун бур:

«Идавсил [саллаллагьу аьлайгьи ва саллям] цIувххуна: "Къааьркинссарав на зу тIайла буллан бунагьру багъишла битаймунин?" "Бува, я Аллагьнал Идавс!" – увкуна асхIабтурал. "ЗахIматсса иширттавугу камилну, щаллуну чаклин биссаву, чIявуну мизитравун гьаву, ца чаклил хъирив гамуних ялугьлагьаву – мури хIакьсса кьянкьашиву"». (Муслим).