Жула Идавс, жула Мухlаммад ﷺ

Идавстурал хьхьичIа-хьхьичIма Адамри [аьлайгьи салям], махъа-махъма МухIаммадри [саллаллагьу алейгьи ва саллям]. МухIаммадлул [саллаллагьу алейгьи ва саллям] ппу Аьбдуллагьри, нину Аминатри, ккуккулул нину ХIалиматри. Цувагу Идавстурава яла ххирамари. КIаная махь цама идавсгу акъассар.

КIанал Шариаьтгу Кьиямасса Кьини дукканнин личIантIиссар баххана къабувну. КIанал умматгу вайми умматиннава яла хъинмири. Цувагу Маккалив увссар итни кьини рабиоьл-аввал тIисса зурул ацIния кIилчинмур кьини. Яла оьрмулул мукьцIалла шинавун ивукун, Аллагьу Тааьланал Идавсшивугу дуллуну халкьунначIан гьан увссар Маккалив унува.

Яла Идавсшиву дуллуну ацIния шанна шин хьувкун Жабраил гьан увну Маккалияту Мадиналив лихъан увссар мушриктурал ивчIан кьаст лархIукун. Яла Мадиналив авцIуссар ацIра шинай халкьуннайн оьвтIий Исламрайн.

Яла Аллагьу Тааьланал амрулийну Исламгу аьлтгу дурккун, куфрулуяр дингу цIакь хьувкун, оьрмулул ряхцIаллий шанна шин хьуну махъ ивкIуссар, Мадиналив увччуссар.

Идавсил [саллаллагьу алейгьи ва саллям] сурат

Идавс [саллаллагьу алейгьи ва саллям] чурххал я лахъсса акъа, я кутlacca акъа, дянивсса ия. Барт каругу бакI ччаннугу ганзсса, яругу лухIисса ия. Чансса ятIул бивщусса кунмасса гьартасса ненттабакIгу бия. ИттацIанттугу лухIисса, лахъисса ия. Зума бакIгу гьартасса ия. Ккарччава нанисса щин марцIсса ия. Гъалгьа тIун ивкIукун, нур кунна ххал шайсса ккарччив цанния ца дурцусса дия. Дарвач кIяласса ия, арцул шуша кунмасса. Майгу лахъисса бия. МицIмай  кIюласса, дянива бюхттулсса бия.

ЧIавру кьасса дия. ЧIири лухIисса, ццунсса бия. АцIния арулла чIара дакъа кIяла хьуну дакъая. Хъазам гьартасса пар-пар тIисса дагьани кунмасса бия. КIивагу хъачIунттал дянивалу архсса ия. ХъачIунттал дянив Идавсшиврул мугьругу бия. Хъазамиралгу, цIумуккутIнилгу дянив ца щяпа кунма кIяласса чIарарал щагу бия. Каруннил ликри лахьисса ия. БитIянхъру гьартасса ия. БухчIинссагу хъунмасса ия.

БакIччанну бювчIусса, куклусса ия. ЧIанччаннугу цава-цасса ия, дянив рахI дакъая. Лякьа илтIасса ия. Лажин хъиннура ххуйсса ия, ацIния ххюннил хьхьунил зуруха лархьхьусса, пар-пар тIисса дия, хьинну ккурккигу дакъасса, чIирисса ссумасса кунна дия. Цувагу [саллаллагьу алейгьи ва саллям] канил чулуха, арамтурава яла сахаватма ия. Гъалгъалул чулуха яла тIайлама ия.

ТIабиаьтрал чулуха яла куклума ия. Кьункьал чулуха яла нахIума ия. Цал ккавккукун адимина нигьа усайва, кIилчин ккавккукун личIий хьун кьашайва нахIушиврул. Цавува цувагу хъунасса ия, халкьунначIагу хъунасса ия. ХьхьичIа ххал шайсса кунма, махъагу ххал шайсса ия.

Я Аллагь, Заннал цайгу цIими бишиннав! Цалла ляхьан дурсса гьарзадрал бакIрахсса цал шафааьтрая жувагу махIрум къабуваннав, цал кьюкьлувух бизан буваннав Кьиямасса Кьини жувагу!

Идавсил [саллаллагьу алейгьи ва саллям] кулпат

Идавсил [саллаллагьу алейгьи ва саллям]  хъаннил хьхьичIра-хьхьичIмур Хадижатри Хувайлидлул душ. Яла Савдатри Замаьтлул душ. Яла Аьишатри Абу-Бакрдул душ.

Вай шанмагу Маккалив бувцуссар. Мадиналив бувцуми хъами – ца XIафсатри Оьмардул душ. Яла Умму-Салиматри Абу-Умаятлул душ. Яла Умму ХIабибатри Абу-Суфьяннул душ. Яла Жувайриятри ХIарислул душ. Яла Сафийятри ХIуялул душ.

Яла Зайнабри ДжахIшлул душ. Яла Маймунатри ХIарислул душ. Ялагу Зайнабри Хузайматлул душ. Ца Марийят тIисса ссурмухьхьугу бивкIун бур Мукьавкьис тIисса Искандарайливсса паччахIнал ссайгъатран гьан бувсса. Ца Шараф тIиссагу диркIун дур. Цинярда ацIния шанна диркIссар.

Идавсил [саллаллагьу алейгьи ва саллям] авлад

Идавсил [саллаллагьу алейгьи ва саллям]  шама арс ва мукьва душ бивкIссар. Миннал хьхьичIа-хьхьичIма Кьасим тIисса арсри, яла Зайнаб тIисса душри, яла ТIагьир тIисса арсри, яла Умму-Кульсум тIисса душри, яла ФатIиматри, яла Рукьиятри. Вай Маккалив унува бувссар Хадижатлуяту. Яла Мадиналив увкIукун Ибрагьим тIисса арс увссар Марийят тIисса ссурмухьхьияту. Душвараву хъунма-хъунмур  Зайнаб тIимур душ Абуль-Аьс тIисса адиминан буллуссар.

Ганиятугу Аьли тIисса арс хьуну балугърайн ияннин хьхьичI ивкIуну ур. Умамат тIисса душгу бувну, кIагу ФатIимат бивкIуну мукьах Аьлил [разияллагьу аьнгьу] бувцуну бур. Рукьият ва Умму-Кульсум тIурча, кIивагу халифа Оьсманнул [разияллагьу аьнгьу] бувцуну бур, ца бивкIукун ца.

Оьсманнул [разияллагьу аьнгьу] буциннин хьхьичI кIай кIивагу ца Оьтбат ца Оьтайбат тIисса Абу-Лагьаблул арсварахь бивкIссари тIарча, яла Абу-Лагьаблул хIакъираву «Таббат» тIисса Кьуръандалул сура ливккукун, арсварахь куссар тIар МухIаммадлул душру буккан къабуварча, зу ттул арсру бакъару куну, яла кIайннал буккан бувну Оьсманнул бувцуссар тIар.

ФатIимат тIурча, Аьлин [разияллагьу аьнгьу] буллуну бур Аллагьнал ИдавсичIан [саллаллагьу алейгьи ва саллям] Жабраил гьан увну, була куну. ФатIимат личIаннин цинявппагу оьрчIру Идавсияр [саллаллагьу алейгьи ва саллям]  хьхьичI ливтIуну бур. Му тIурча, Идавс [саллаллагьу алейгьи ва саллям]  ивкIуну ряхва барз хьувкун бивкIуну бур.

Оьрмулул кьуния урчIра шин хьуну диркIун дур. ФатIимат бакъасса гайми оьрчIаяту авладгу къавхьуну бур. ФатIиматлуятугу мукьва оьрчI хьуну бур: ХIасан, ХIусайн ва МухIсин тIисса шама арс увну ур. МухIсин тIима чIивину унува ивкIуну ур.

Умму-Кульсум тIисса душгу хьуну бур. KIaгy Оьмардул [разияллагьу аьнгьу] бувцуну, кIаниятугу оьрчI къавхьуну бур. Утти ва дунияллий буцири Идавсил [саллаллагьу алейгьи ва саллям] авлад ХIусайннуяту ва ХIасаннуятури [разияллагьу аьнгьу], минная цинявнная Аллагь  рязи хьуннав.

Идавсил [саллаллагьу алейгьи ва саллям] хасият

Идавс [саллаллагьу алейгьи ва саллям] ттуккуй буртти икIайва, ялун алигу дуртун. Цала махъ цамагу буртти итайва. Уссулун къурша бищайва, янналуй мачI дизайва, ичIувссаннал дучIи-аьркинмуних уругайва. Дукра дувайни шаппаминнащал дикIгу духъайва. ХIая цIакьсса ия. ЦукунчIав адиминал лажиндаравун къауругайва. Лагънал оьвчирчагу, узданнал оьвчирчагу жавабгу дулайва.

Ца кьюлтI учинсса накI дучIарчагу ссайгъатгу кьамул бувайва. Цалва лагьссурмущияр личIийсса дукра дугу къадукайва, яннагу къалаххайва, дакъасса ури куну кьюкьингу къаувайва, дусса ури куну хъунгу къаувайва, цу хьуна акьирчагу ссаламгу булайва. Чак буллай уну адимина ялун учIарча, чак куклу бувну (кутIа бувну), ссалам буллуну зана икIайва, вил аьркиншиву дурив, куну цIуххайва. Аьркиншиву духьурча, гагy барт диргьуну, цала чаклийн зана икIайва.

Идавсил [саллаллагьу алейгьи ва саллям] хъус

Расулуллагьнал къатлуву [саллаллагьу алейгьи ва саллям] ца бартбисугу бия, цуппагу бурчул, виватугу чассагул ххаллал бувцIусса, шанна накI лахъисса, накI ва дачIи уттасса. Ца аьсавгу дия, ца мура аьсав куннасса чул бищайсса задгу дия. Ца щяпагу  бия. Мукьва чадахIгу бия: ца кIущин байсса тIаннул бия, ца щин хIачIайсса бия, ца цамургу шанна кIанай арцул щинзир дусса бия, ца ялагу пюрунналул бия.

Ца гьарацIигу дия, ца суйлукьгу бия, ца ак иссайсса (чурх шюшайсса) задгу бия дукнилул саргъас кунмасса, ца аьгъушиву дишайсса задгу дия.

Ца дагьани ва ттаралгу, ссурмав бичу ва хIисилугу дишайсса задгу дия, ца куркалугу бия, ца ccaxIгy бия, ца мутгу бия, ца кьатIифагу дия, ца тахтагу дия, ца муххал, ца арцул кIива кIиссагу бия, ца кIилигу дия. МукьцIаллий ххюва ттизайсса варанигу бия, ттуршва ттагу бия, ряхва цIукугу бия ттизлан цайминнал буллусса.

Идавсил [саллаллагьу алейгьи ва саллям] ярагъ

МухIаммад Идавсил [саллаллагьу алейгьи ва саллям]  ца Оькьаб тIисса ттугьгу бивкIун бур. Ца Зулфукьар, ца Михзам, ца Расуб, ца Кьазиб, ца Мабур, ца Аьзбу, ца Кьулаъ, ца Басар тIисса урчIра тypгy диркIун дур.

Ряхва ккурттагу бивкIун бур: ца Катум тIисса, ца Раваз тIисса, ца РавхIаъ тIисса, ца Сафраъ тIисса, ца ШавхIатI тIисса, ца Зассадад тIисса. Ца Кафур тIисса чIатIаракIру дичайсса задгу диркIун дур.

Арулла хIурнигу диркIун дур: ца Затуль Фудзул тIисса, ца Затулъ Вишаъ тIисса, ца Физзат тIисса, ца Затуль ХIаваши тIисса, ца Сааьдийят тIисса, ца Батраъ тIисса, ца Харнакь тIисса.

Шанма баркIгу бия: ца Залвуф тIисса, ца Фаткьу тIисса, ца барзул сурат дусса бия цамургу.

Мукьва ччалагу бия: ца Машва тIисса, ца Мушни тIисса, кIива цаймигу бия. Ца Сабувгь тIисса такьиягу бия.

Идавсил [саллаллагьу алейгьи ва саллям] ризкьи

Идавсил [саллаллагьу алейгьи ва саллям] буртти икIайсса варанттугу бия ца Кьасваъ тIисса, ца ХIадаъ тIисса. Дул-дул тIисса вилцIунгу бия. Яъфур тIисса ттуккугу бия. Ца Аьйбат тIисса ттизайсса ттагу бия. Дуниял цал цIаний ляхъан дурсса паччахIнал ичIура вай хъус диркIун дурча, зу тамаша бувара ванал дуниял ихтияр къадаврий, дунияллух баччи бакъашиврий.

Я Аллагь, цал шафааьт жуйнгу бияннав Кьиямасса кьини, цал лажин ккаккан нясив дуваннав, мунал кьюкьлувух бизан буваннав! Амин!

СалляЛлагьу аьляйгьи ва саллама ва аьля алигьи ва сахIбигьи ажмаэна. Амин бирахIматика я архIама-р-рахIимин вальхIамду лиЛлягьи Раббиль аьламин.

Шайх Жамалуттиннул «Кифаятуль-аьвам» луттирава.