Кьуръандалул караматру

Бусурманнал Луттираву тIитIин бувну бувсун бур тамансса элмийсса ва тарихийсса далиллу. Кьуръан ликкан бувсса заманнай ми иширттая инсантуран кIулну ча бикIанссия, пикривагу къахьунссия. Мукунсса циняв аятру цачIун буварча, щаллусса жуж ита бакьин хьунссар. Шиккурив буцинну ца-кIива аьламатсса аят.

Кьуръандалул караматру
Кьуръандалул караматру

Фиръаьвннул кьаркьала

Кьуръандалуву бувсун бур Муса идавсийн عليه السلام данди увксса Фараон (Фираьвн) цува хьхьиривун оькьантIишиву чIалан бивкIукун, иман дирхьушиву, Аллагьнайн вих хьушиву баян бувсса. Мукун цала жан ххассал дувансса умудрай. Мунан жавабран Аллагьнал Кьуръандалуву увкуну бур (мяъна): «Так цIана! Уттинин ина мютIий акъа, дунияллийх пасатшиву ппив дуллай ияв. Мунияту жу вил чурх ябуванну, вил хъиривминнан мисалну бикIаншиврул» («Юнус» суралул 91-92 аятру).

Ва аят гьан бувсса чIумалгу, ганияр махъ ттуршрахъул шинну ларгукунгу щинчIав къакIулссия Фираьвннул кьаркьала ядурну душиву. Цала оьрмулул махъва-махъсса кьини суждалийн агьсса Фираьвннул жаназа дуссар Британнал музейраву.

Чутшиву

Цамур аятраву увкуну бур (мяъна): «Жу гьарца зад ляхъан дуварду чутну…» («аз-Зарият» суралул 49-мур аят)

Ва аят ликкан бувсса заманнай халкьуннан кIулну бивкIссар инсантурал, хIайвантрал ва цаппара ххяххиярдал чут бикIайшиву. Элму хьхьичIуннай наниссаксса кIул хьуссар гьарца задрал цинмасса чут бушиву – уттарамур дикIу, рухI дакъамур дикIу, хIатта атомравусса зарядрая тIайла хьуну, ссавруннайсса ттуруллайн бияннин.