Компьютерданул тIуркIурду

Наши дети много времени проводят за видеоиграми!

Компьютерданул тIуркIурду
Компьютерданул тIуркIурду

Аминат бур чIивисса оьрмулувусса дуклаки душ. Ванин хъинну ххирар компьютерданий тIуркIу буллан. Ми тIуркIурдал чIярусса чIун дачIра харж дуллай душиву бувчIлай бунугу, цукунчIав му хасият кьадитан ванища бюхълай бакъая, ца иш хьуннин. 

Ца кьини Аминатлул нину даврийн бачиннин, цила душнин шарда дувансса давурттал хIакъиравусса буюрду бувну бур:шану лази-лакьи буван, тIахIникIичIу шюшин ва къатлувух цIушибуккан. Вай давуртту Аминатлул гьарца кьини дувайсса диркIундур, аьдат хьуну бивкIун бур. Аммарив га кьини душнил дакIнивубивкIун бур цIуну байбивхьусса компьютерданул тIуркIу, хьхьугукьинигу букларчагу бизар къашайсса.

– Чан-кьансса тIуркIугу бувну, ттула давуртту дуванна, – цихьва цуппа тIий бивкIун бур Аминат.

Ванин бувчIлай бивкIун бур цIана тIуркIу тIунсса чIун дакъашиву, цанчирча, школалийнгу гьан багьлай бивкIунтIий, амма компьютерданух щякъабикIансса яхI дакIниву къалявкъуну бур.

Лавхъун компьютергу, душ щябивкIун бур тIуркIулух. Ларгун дур минутIру, дачIиссят, ссят, кIира. Амма мониторданувун бювкьсса душнин гьарзад хъама бивтун бур.

Ца чIумал чантI увкусса кунма Аминат цийнма цуппа бувкIун, ццах куну бур. Школалий дарс дайдишин ацIра минутI лирчIун диркIун дур. 

– Вагьуя, ацIра минутIрава дарсру дайдишин най дур, нарив хIадур хьунувагу бакъара! Ниттил дува увкусса давурттугу къадував, цири утти бувайсса! – тIун бивкIун бур душ.

Ванин бувчIуну бур тIуркIулухух лавгун чIярусса чIун ссанчIав дакъа харж хьушиву. Утти къатри лакьлантIиссарив ягу школалийн гьанссарив къакIулну ливчIун бур. Цал дарсирдайн гьан хIукму бувну бур.

Паща тIий бувххун бур классравун, амма дарс дайдирхьуну ляркъуну дур. Учительницал Аминатлул ниттийн оьвкуну, аьрза бувну бур.

Школалия махъ шаппай бувкIукун, ганих ялугьлай диркIун дур сси бивзсса нину. Бувну бур душнин танмихI. Амма Аминатлун танмихI баву къащи хьуну бакъарча, цищава цила чIун харж даврий ялув бацIан къабюхъаву къаччан бивкIун бур.

– Ттуйва нава каялувшиву дуван бюхълай бакъахьурча, бувагу тай тIуркIурдай къабукланна, - куну бур ванил.

Цихьхьунма цила буллусса махъ бацIан буваншиврул, Аминатлул циняв тIуркIурду компьютерданува леххан бувну бур. Ва гания махъ цила чIун так гъанминнащал, дустуращал гьан дувайсса диркIун дур.

ЧIалай бурив, оьрчIрув, ялун бурган зарал бакъасса тIуркIурдалгу бюхъайссар оьккисса хIасил хьун. Мунияту, хайр бумур, хъинмур булларча хъинссар.

Нитти-буттал увкумургу гацIана биттур буван аьркинссар!