Кулпатрал «ттеркьукьив»

Жемчужины семьи. Имам аль-Гъазалинал луттираву чивчуну бур: «ОьрчI – нитти-буттахьхьун аманатну дуллусса хъусри. Ганал марцIсса дакI – кьимат лахъсса ттеркьукьири. Мунал дакIний цукунсса накьич дуварчагу – кьамул дувайссар».

Кулпатрал «ттеркьукьив»
Кулпатрал «ттеркьукьив»

Мунин бувну, оьрчIан чIивинияцIа ххуйсса тарбия дуллума, Аллагьнал цIимилийну иянтIиссар дунияллул ва ахиратрал талихIрайн. ОьрчIал бувсса хъинсса аьмаллал чири ниттийн ва буттайнгу биянтIиссар. Диндалул луттирдаву увкуну бур, чIивисса оьрчIан Аллагь ва Идавс кIицI лаглан лахьхьин бувсса инсаннан Кьиямасса кьини хIисаб къадувантIиссар куну.

МухIаммад Идавсил щарссанил Аьишатлул رضي الله عنه бувсун бур: «Ца кьини ттучIан кIива душнищалсса хъами-тайпа бувкIун, дукансса задчIа увкуна. ТтучIа ганин дулун цичIав дакъая, так цакIива чассаг личIаннин. На гайннан ца-цаннин ца-ца чассаг буллуссия. Циламур чассаг кьацIливу бишин нанисса щарссанихь душварал гагу цанма була увкуна. Ганилгу чассаг кIибувхъуну душваран буллуна.

Ва иширая Идавсин бавукун, ганал увкуна: «Душру – инсаннал ва дужжагьрал дянивсса барури» (Тирмизи).

Ва хIадисрава бувчIлай бур яхI бувну душру хъуни бувсса инсан дужжагьрая ххассал хьунтIишиву, миннан багьайкунсса тарбия дулурча.

Цамур хIадисраву Расулуллагьнал увкуну бур: «Хъуни хьуннин кIива душний аякьа дурсса инсан Кьиямасса кьини ттул чIарав икIантIиссар». Мукунгу куну Идавсил цачIу бивхьуссар каруннил кIисри. (Муслим).

МухIаммад Идавсил мукун душру личIи баврил сававгу – ми заэвсса бушиву ва минначIансса ччавури. КIа хIадисраву кIицI лавгсса аманатрайну Идавсил гьаз бувссар душварал кьимат. Нитти-буттал аьркинссар цала душру хъинсса тагьарданий тарбия буллан, миннан ххуймур лахьхьин буван: мяърипат, духIи-дуцин, бусурмансса багьу-бизу, хIурмат-адав. Цанчирча, миннаяри ялун нанисса никирал ниттихъул хьунтIисса. Душ тарбия бувманал щаллусса кулпат, тухум тарбия буллалиссар.

Душ бувсса инсаннан суннатссар хъуннасса ххаришиву даву. ХIадисраву бувсун бур цалчин душ бувсса хъамитайпалун му барачатшивуну лякъинтIиссар, куну. Бусурмансса кулпатраву душнихсса аякьа хъуннасса дикIан аьркинссар.

Ялагу хIадисраву увкуну бур, бусурманну, хIалалну ляркъумуний душ тарбия бувсса инсан мунил Кьиямасса кьини дужжагьрая ххассал увантIишиву.

Идавсил бувсун бур шанма душ ягу шанма ссу хъуни бувсса инсаннай Аллагьнал цIими бивхьуну, Алжаннавун уххан увантIишиву. Мукунма увкуну бур кIива ягу ца душ хъунма бувманаягу. Мунин бувну, душ буварча ца-цавайннал дувайсса пашманшиву лайкь дакъассар бусурманчувнан, цанчирча цума оьрчI барачатсса, ххуйсса тIабиаьт дусса хьувив къакIулссар.

Арсгу, душгу – Аллагьнал неъматри, гьарца оьрчIаву барачат буссар.

Аллагьнал циняв бусурманнан булуннав хъинсса аьмал-хасият дусса оьрчIру ва душру, дуниял-ахиратрал талихIрайн букканнав. ОьрчIру ссавурданий тарбия буллансса тавпикь булуннав. Амин.