Самый ценный аят из Корана – аят Аль-Курси

Кьуръандалуву буссар ца аят, цайми аятирттаяр даража лавайсса, му циняв аятирттал ханни.

КIицI лавгсса аят хъанахъиссар «Аятуль-Курси» – «аль-Бакьара» тIисса суралул 255-мур аят (Аллагьу ла илагьа илла гьува…). Му аят дакIних къакIулсса ягу муния къабавсса бусурманчув акъахьунссар. Мунивусса ххирашивуртту хъинну чIяруссар.

Абу Умамал бувсун бур Идавсил [саллаллагьу аьлайгьи ва саллям] увкушиву:
«ИсмуЛЛагь аль аъзам» - Аллагьнал яла бюхттулмур ЦIа дуссар шанма суралуву: «аль-Бакьара», «Али Имран» ва «ТIагьа». Му цIанийну дуаь дуварча, чара бакъа Аллагьнал жаваб дулайссар».

Цамур хIадисраву увкуну бур:

«Мукъурттил хан – Кьуръанди, Кьуръандалул хан – «аль-Бакьара» тIисса сурар, му суралул хан – «Аятуль-Курси» тIисса аятри».

Ялагу:

«Гьарца фаризасса чаклил хъирив «Аятуль-Курси» дуккайманан Алжаннавун уххан цичIав дахчилай дакъассар – мунан так ва дуниял кьадитанни ливчIсса. Му мудан ккалангу так хIакьсса Аллагьнал лагънаща бакъа къашайссар».

«Аятуль-Курси» утту ишайни дуккирчагу хъинссар щяйтIан арх буваншиврул. МухIаммад Идавсил [саллаллагьу аьлайгьи ва саллям] увкуссар:

«Утту ишайни «Аятуль-Курси» буккайма Аллагьнал уруччинтIиссар. Мукунма, буруччинтIиссар мунал чIаххулгу, лагмасса къатригу».

Имам АхIмадлуя бивсса хIадисраву увкуну бур:

«Аятуль-Курси» – Куръандалул бачIиннул бачIиксса даража бусса аятри».

ГьунчIукьатIан

«ГьунчIукьатIан» тIисса луттираву увкуну бур:

«Аллагь Тааьланал ляхъан дурсса задирттаву «Аятуль-Курсинияр» ххирасса зад дакъассар. Мунил ххирашиврул, хъуншиврул хIисав дакъассар. Мунил ххирашиву кIул хьурча, паччахIтурал паччахIшивуртту кьадиртуну, мунихух машхул хьунссия.

Дуниялгу, ахиратгу ччима, хъуннасса ххаришиву хIасул хьун ччима, барачатру гьарза хьун ччима, гьарца мурадрайн иян ччима му буклай даим хьувча. Му буклай даим хьума дунияллийгу ахиратлувугу халкьуннал дянив паччахI куна икIантIиссар.

МарцIну, халисну му аят буккирча щяйтIан-иблис арх шайссар, сихIирчи, зулмукар гъан къашайссар, душмантурая уруччайссар, Бала-мусиватрачIа буккирча, му яла лагайссар. Гьарца цIуцIаврин дару-сававрангу мюнпат хьунмассар.

ЛивтIунал рухIирдан булун буккирча, гьарцаннал гьаттавун мунил нур духхайссар. Машрикьрая магърибрайн диянуксса гьаврдугу гьарта дайссар. Хьхьувай утту ивхьукун буккирча кIия малаик вакилтал байссар, мунал ялув кIюрххилнин му уруччин.

ИчIату уккайни буккирчагу, хIажат барт дигьайссар, мурадрайн ияйссар. Хаснува чаклил хъирив буккаву хъиннува хъинссар. Ца чак бувну, хъиривмур чак буваннин бала-апатIирттаягу уруччайссар».