ЦIуминалийсса ЦIуссалакрал шяраву ларгунни райондалул ифтIар

Мартрал 22-нний ЦIуминалийсса ЦIуссалакрал шяраву ларгунни райондалул ифтIар. Ванин хасну шяраваллил мизитрал чIаравсса тазиятрал къатлуву хьунни жяматрал батIаву ва динийсса мажлис. 

Мажлис бачин бувуна жяматийсса ишккакку МухIаммад МухIаммадовлул. Аьдатрайн бувну, дайдихьу дуруна мубараксса аятру буккаврийну. Кьуръан бувккуна МахIачкъалаливсса хIафизтурал мадрасалий дуклакисса жагьилнал.

Цалчин махъ лахъан увккуна МахIачкъалалул имамтурал советрал каялувчи Даниял Умаилов. Ванал бусуна Рамазан зуруй цадакьа ва цаймигу хъинсса давуртту даврил агьамшиву ва Закатуль-фитIр (ссахI) гьарца бусурманчунайсса бурж бушиву.

ЦIуссалакрал райондалул бакIчи МаматIи ХIамзатовлул барчаллагь увкуна мажлис хIадур бан кумаг бувминнахь, хаснува Новостройрал имам Хаваев Мансурдухь. Ванал дакIнин бувтуна мубараксса Рамазан барз бушиву хъинбаларду гьарза буван аьркинсса, ххуймур чулиннайсса даханашивуртту дувайсса барз.

Дагъусттаннал жяматийсса палаталул каялувчинал хъиривчу Ссапарбаг Аьбдуллаевлул чIурчIав дуруна укунсса мажлисирттал жямат цачIун байшиврий ва ялун нанисса ник лайкьну тарбия дувансса сававну шайшиврий.

Дагъусттаннал Гуманитарный Институтрал зузала Тумалаев Давудлул бувсуна жагьилтал аьркин бакъасса, бяйкьусса чулинмай бачаврия буруччиншиврул чара бакъа тIайласса диндалул элму-кIулши дулун аьркиншиву.

БавтIминнан ккаккан дуруна Башларовлул цIанийсса медколледжрая, Гуманитарный институтрая ва колледжрая бусласисса, мукунма Новостройрай буллалисса мадрасалун хас дурсса видеороликру.

Мажлисрал ахирданий махъ лавхъуна Хаваев Мансурдул. Имамнал дакIнин бувтуна лак муданмагу дин дусса, Исламрал ххуллу бувгьуну нанисса, лайкьсса миллат бивкIшиву. Ванал цала чулуха барчаллагьрал чагъарду ва дакIний личIансса бахшишру дуллуна диндалул иширттаву чялишну ка-кумаг бувайминнан.