Дуа за наших детей

Циняв нитти-буттахъал хIарачат бикIай цалва оьрчIай аякьа дуллай, гай бала-апатIирттая ва оьбалардая буручлай, цалва оьрчIру талихIрайн букканмур буллай.

Бусурманчу тIурча, так цалва хIарачатрайну гьашиву къадурну, Аллагь Тааьланаягу кумаг тIалав буллан икIайссар, цанчирча мунан кIулссар дунияллий хъанахъимур так Заннал чичрулийну ва кьудратрайну хъанахъишиву.

Абу Гьурайрал  бувсун бур МухIаммад Идавсил [саллаллагьу аьлайгьи ва саллям] увкумур:

«Щак бакъассар шамуннал дуаь Аллагьнал кьамул дувайшиву: зулмулухьхьун иривманал, ххуллулссаннал ва нитти-буттахъал цала оьрчIаха дурмур» (Ибн Мажагь).

Ва макьалалуву кIицI лаганну нитти-буттахъал цалва оьрчIру оьмуния буруччиншиврул дурккуну хъинсса шанна дуаь.

I. МухIаммад Идавсил [саллаллагьу аьлайгьи ва саллям] цалва душнил оьрчIру буруччиншиврул укунсса дуаь дуккайсса диркIссар:

أُعِيذُكُمَا بِكَلِمَاتِ اللهِ التَّامَّةْ مِنْ كُلِّ شَيْطَانٍ وَهَامَّةْ وَمِنْ كُلِّ عَيْنٍ لَامَّةْ

«У‘иҙукума́ бикалимати-Ллягьи-т-та́ммати мин кулли шайтIа́нин ва гьа́мматин ва мин кулли аьйнин ля́мматин».

«Аллагьнал камилсса мукъурттийну на зу буруччаву тIалав буллай ура гьарца щяйтIаннуя, загьру бусса ущу-щулгъилуя ва оьсса яния (я лачIаврия)».

Ва дуаь ца оьрчIаха дуклакисса чIумал «У‘и́ҙукума́…» къаувкуну, «У‘и́ҙука…» учайссар. Душниха ккалаккиний учайссар «У‘и́ҙуки…», чIявусса оьрчIаха дуккайни учайссар «У‘и́ҙукум…».

II. Кьуръандалий чирчуну дур Ибрагьим идавсил цала арс Исмяиллущал Кяъба цIунил бувсса чIумал дурсса дуаь:

رَبَّنَا وَاجْعَلْنَا مُسْلِمَيْنِ لَكَ وَمِنْ ذُرِّيَّتِنَا أُمَّةً مُسْلِمَةً لَكَ وَأَرِنَا مَنَاسِكَنَا وَتُبْ عَلَيْنَا إِنَّكَ أَنْتَ التَّوَّابُ الرَّحِيمُ

«Раббана ваджаьльна муслимайни ляка ва мин ҙурриййятина муслиматан ляка ва арина манасикана ва туб аьляйна иннака анта-т-таввабу-р-рахIим»

«Я Аллагь, жу кIиягу Вийнма мютIийминнавух бува, жул наслулувату Вийнма мютIийсса кьавм (жямат) хьун бува, Вийнна эбадат дуллансса низам дурчIин дува, жул тавба кьамул дува, Ина мяйжаннугу тавба кьамул Дуваймара, РахIму Буваймара» («аль-Бакьара» суралул 128-му аят).

III. «Иаьнату-ТIалибин» тIисса луттирай чирчуну дур нитти-буттахъал цала оьрчIру буруччин дурккуну хъинсса дуаь:

حَصَّنْتُكَ بِالْحَيِّ الْقَيُّومِ الَّذِي لَايَمُوتُ أَبَدَاً ودَفَعْتُ عَنْكَ السُّوءَ بِأَلْفِ أَلْفِ لَا حَوْلَ وَلَا قُوَّةَ إِلَّا بِاللهِ الْعَليِّ الْعَظِيمِ

«ХIассантука биль-хIаййи-ль-кьаййу́ми-ллязи́ ля́ яму́ту абадан, ва дафаъту аьнка ссу́а би альфи альфи ля́ хIавла ва ля́ кьуввата илля́ билля́гьиль-аьлиййиль-аьзим».

«На ина ххуй ував мудан Уттаванайну, мукьах ЛичIантиманайну, тачIав КъавчIантIиманайну (Аллагьнайну). Вияту оьмур арх бував азарилва азарва «ля́ хIавла ва ля́ кьуввата илля́ билля́гьиль-аьлиййиль-аьзим» увкуну».

Ва дуаь ца оьрчIаха дуклакисса чIумал учайсса куццуй чирчуну дур. Душниха ккалаккиний учайссар «…хIассантуки…» ва «…аьнки…», чIявусса оьрчIаха дуккайни учайссар «…хIассантукум…» ва «…аьнкум…»,.

Аллагьнал жувагу, жулва оьрчIругу питнардая, бала-мусиватирттая, оьмуния буруччиннав! Амин.