Аллагь Тааьланал кIюрххи-цIун чIумуву барачатгу бивхьуну, му чIумал эбадат гьарза дувара куну бур

Ва амру биттур бувну, кIюрххицIун чIумал гьарзану зикри-дуаь дуккирча, щала кьинигу барачатну гьантIиссар

Анаслул бувсун бур МухIаммад Идавсил [саллаллагьу аьлейгьи ва саллям] увкусса махъру:

«Щаллусса хIажлил ва оьмралул чIири хьунтIиссар кIюрххил чак жяматрай бувну, баргъ гьаз хьуннин Аллагь кIицI лаглай щягу ивкIун, яла кIира ракааьт суннат-чаклил дурманан» (ат-Тирмизи).

Идавсил [саллаллагьу аьлейгьи ва саллям] сунналийн бувну дуссар кIюрххицIун чIумал дурккуну хъинсса дуаьртту. Зувагу зула гъанмийгу бала-апатIирттаща буруччин, цIуну дуркIсса кьини барачатну гьан дуван ччай бухьурча, кIюрххил вай дуаьртту дулуккияра:

1. Абузарр-асхIабнал бувсун бур Идавсил [саллаллагьу аьлейгьи ва саллям] утту ишайни учайсса бивкIшиву:

باسْمِكَ اللهم أحيا وأموت

«Бисмика Аллагьумма ахIъя ва амуту» («Аллагьнал цIанийну, уттавагу литIунгу бувайсса»), кIюрххил чантI учайхту:

الحَمْدُ لِلَّهِ الَّذي أحيانا بعد ما أماتَنا وإلَيْهِ النشُور

«Аль-хIамду ли-Ллягьи ллязи ахIъя-на бяъда ма амата-на ва иляйгьи-н-нушур». («Аллагьнайн щукру, жува уттава бувсса литIун бувну мукьах, ва МуначIанни жула зана шаву»). (аль-Бухари).

2. Абу Гьурайрал бувсун бур Идавсил [саллаллагьу аьлейгьи ва саллям] увкушиву: «КIюрххил бивзукун учара:

الحمدُ لِلَّهِ الَّذي رَدَّ عَلَيّ رُوحِي، وَعافانِي في جَسَدِي، وأذِن لي بذِكْرِهِ

«Аль-хIамду ли-Ллягьи ллязи радда аьляйя рухIи, ва аьфани фи жасади ва азина ли би-зикригьи» («Аллагьнайн щукру, ттувун рухI зана дурсса, ттул чурххан цIуллушиву дуллусса ва Цува кIицI лаган ихтияргу дуллусса»). (Ибн ас-Сунни).

3. Аьишатлул [разыаллагьу аьнгьа] бувсун бур Идавсил [саллаллагьу аьлейгьи ва саллям] махъру:

«Аллагь Тааьланал багъишла итантIиссар ва дуаь дурккума, мунал бунагьру хьхьиривусса хьамараксса бухьурчангума:

لا إِلهَ إلا الله، وحده لا شَريكَ لَهُ، لَهُ المُلْكُ، وَلَهُ الحَمْدُ، وَهُوَ على كُلّ شيء قدير

«Ля илягьа илля Ллагьу вахIдагьу ля шарикя лагьу, лагьуль-мульку, ва лагьуль-хIамду, ва гьува аьля кулли шай’ин кьадир». (Ибн Ас-Сунни).

4. Абу Гьурайраяту бувсун бур укунсса хIадис:

«Кьиямасса кьини яла хъинмур хъусну лякъинтIиссар кIюрххил ва хьхьувай ттуршилва вай махъру тIурча:

سُبْحانَ الله وبحمده

«СубхIаналлагьи ва бихIамдигьи». (Муслим).

5. Цамур хIадисраву бувсун бур МухIаммад Идавсил [саллаллагьу аьлейгьи ва саллям] ччя-ччяни кIюрхил ва дуаь дуккайсса диркIшиву:

اللَّهُمَّ بِكَ أصْبَحْنا، وَبِكَ أمْسَيْنا، وَبِكَ نَحْيا وَبِكَ نَمُوتُ، وَإِلَيْكَ النُّشُورُ

«Аллагьумма, бика ас-бахIна, ва бика амсайна, ва бика нахIъя, ва бика намуту ва иляйка-н-нушур» (Абу Давуд).

6. Шамулчинма халиф Оьсман-асхIабнал бувсун бур укунсса хIадис:

«Гьарца кIюрххил ва гьарца хьхьувай шамилла ва дуаь дуккайманан ссалчIав зарал къабувантIиссар:

باسْمِ اللَّهِ الَّذي لاَ يَضُرُّ مَعَ اسْمِهِ شَيْءٌ فِي الأرْضِ وَلا في السَّماءِ، وَهُوَ السَّمِيعُ العَلِيمٌ

«БисмиЛлягьи ллязи ля язурру мааь-смигьи шай’ун филь-арзи ва ля фи-с-самаи, ва гьува-с-самиоьль-аьлим» (Тирмизи, Абу Давуд).

7. Абу Дардал бувсун бур Идавсил махъру:

«Гьарца кIюрххил ва хьхьувай арилва вай махъру учайма Аллагьнал ххассал увантIиссар дунияллул ва ахиратрал захIматшивурттая:

حَسْبِيَ اللَّهُ، لا إِلهَ إِلاَّ هُوَ، عَلَيْهِ تَوَكَّلْتُ، وَهُوَ رَبّ العَرْشِ العَظِيمِ

«ХIасбия-Ллагьу; ля илягьа илля гьува; аьляйгьи таваккальту, ва гьува Раббуль-аьршиль-аьзим» (Ибн ас-Сунни).

Жунма чIалай бур, чансса хIарачат буварча, Аллагьнал жуятува бала-апатIру, захIматшивуртту арх дурну, хъунмасса чири чичинтIишиву.