Салаватрал даража
Достоинство чтения салавата на пророка Мухаммада [саллаллагьу алейгьи ва саллям]
Иса Омаров
Салават дутаврил даража
ХIатта, ца ссалават Идавсия [саллаллагьу алейгьи ва саллям] дутарча, ацIра Аллагьнал, ацIра малаиктуврал, ацIра цалла Расулуллагьнал [саллаллагьу алейгьи ва саллям] му дуртманаятугу дутайссар, ацIва даража бюхттул бувайссар, ацIва хатIа яла гьан бувайссар.
Гьарца задрал муная салават дутайссар. АцIра салават кIюрххил, ацIра кьуннияллай дутаварча, Кьиямасса Кьинилул ццахханнарая уруччайссар, бивкIулучIасса инжитшиву бигьа дувайссар, идавстуращал, сиддикьинтуращал изангу увантIиссар, сиратIрал ламуйх лахъайний Идавсил [саллаллагьу алейгьи ва саллям] кагу дугьантIиссар, Идавсил ХIавзрая хIачIангу увантIиссар, мунал шафааьтгу биянтIиссар.
Салават чIяруну дутайма бала-апатIрая имин шайссар
Бусурманчу ца бала-мусибатрал увгьувкун, ягу къашайшиврул, захIматшиврул, буруккинттарал увгьувкун, ягу мискиншиврул, пакьиршиврул, кьюкьалашиврул увгьувкун, ягу ца къуллугъраяту, хъуншивруяту укьан увну, мунил къумашиврувун агьувкун, ягу ссавнил апатру ликлан, лухччинул баларду загьир хъанан бивкIувкун, салават чIяруну дутларча, миннуя имин увайссар.
Утти, му салават дутаврил адабругу, мув дутаврил гьайатгу, яла ххирамур: хьхьичIра хьхьичI Идавсия [саллаллагьу алейгьи ва саллям] салават дутан кусса нийят дикIан аьркинссар дакIниву, мазрал давугу хъиннура ххирассар.
Му нийятгу «На нийят дуллай ура идавсийн салават дутан, Заннал амру бувсса куццуй му хъун уван, лавай уван», – куну дуванссар.
Яла «Аллагьумма салли аьла МухIаммадин ва аьла али МухIаммадин ва саллим», – увкуну дутланссар, Расулуллагьгу [саллаллагьу алейгьи ва саллям] цала хьхьичI ацIан увну, мунахь хитIаб дуллай, му хъун уллай, муная шафааьт тIалав буллай усса куна.
Идавс [саллаллагьу алейгьи ва саллям] АллагьначIан ияврин василанугу увну, Аллагьгу, мугу дакIний увгьуну мунил мяъналия пикригу буллай, хиялдая, хаватIирдая дакIгу марцI дурну. Мукун дакъа гъафулну, хияллащал дуртсса салаватрал чири бакъассар. Лахъсса чIунийну, лахъну оьвкуну дутавугу ххирассар.
«НасихIатуль-аьвам» («ГьучIукьатIан»).
