Марьям – идавснал нину

Кьуръандалуву кIицI ларгун дуссар так ца хъамитайпалул цIа. Мугу – Иса идавсил [аьлайгьи салям] нину Марьям. Ганил цIа дур зувиллихъайсса аятирттаву. Му бакъассагу, Кьуръандалул 19-мур суралун «Марьям» тIисса цIа дирзун дур.

Имам МухIаммад ибн АхIмад аль-КьуртIубил «Аль-Джа́миъ ли ахIка́м аль-Куръа́н» тIисса луттираву чивчуну бур:

«Аллагьу Тааьланал цала Луттираву (Кьуръандалуву) цавагу хъамитайпалул цIа кIицI ларгун дакъар, так ца Имраннул душнил (Марьямлул) цIа дакъа. Мяйжаннугу, ганил цIа Кьуръандалуву зувиллихъайсса кIанттурдаву дуссар».

Марьям яхъанай бивкIссар буркIунттайн (идол) икрам байсса халкь бусса билаятрай, амма ганил Аллагьу Тааьланайн бакъа щийнчIав икрам къабувссар. Муниятур га халкьунная арх хьуну, цуппалу яхъанай бивкIсса. ДакIнихтуну эбадат дуллай Марьям хъинну гъан хьуссар ЗанначIан. Сайки ца хьхьуну Аллагьнал ганичIан инсаннал суратрай Жабраил малаик [аьлайгьи салям] гьан увссар. Жабраиллул Марьямлун баян бувссар ганил арсная бюхттулсса идавс хьунтIишиву.

Марьямлул оьрчI баву – ляличIисса караматри, цанчирча, ганил арс увссар ппу акъанува, га хъинну салихIсса, Аллагьная нигь дусса хъамитайпа бивкIссар. Цила циняв иширттаву умуд так Заннайн бивхьуну, дуаьрттаву лабизлай, кумаг чIа учайсса бивкIссар. Уздансса Имраннул наслу Аллагьнал хъун бувссар салихIшиврул, мяърипатрал ва инсапрал эбратну хьун бувну. Имраннул наслулува Марьям язи бувгьуну, циняв бунагьирттая марцIну хъун бувну,

Аллагьнал га абадул абадлий циняв хъаннинсса мисалну хьун бувссар. Мунияту жунма, бусурмансса хъаннин, га хъанахъиссар салихIшиврул, мяърипатрал, дакI тIайлашиврул ва Аллагьнайн мютIишиврул эбрат ласун лайкьмур. ДакIнивусса куртIсса имандалия Марьямлун кумаг хьуссар оьрмулуву тамансса захIматшивурттава буккан. ЗахIматшивурттал га ЗанначIан хъиннува гъан бувссар, дакIниву иман цIакь дурссар.

Марьям Алжаннаву щил кулпатну бикIантIиссар куну цIуххирча, мунил хIакъиравусса хIадис буссар. Абу Умамал [разыаллагьу аьнгьу] бувсун бур МухIаммад Идавсил [саллаллагьу алейгьи ва саллям] Аьишахь [разыаллагьу аьнгьа] увкумур:

«Вин кIуллив Алжаннаву Аллагьнал ттун Марьям щар булунтIишиву?» (ТIабарани).

Цамур хIадисраву бувсун бур Идавсил [саллаллагьу алейгьи ва саллям] укуннасса мяъна дусса махъру Хадижатлул [разыаллагьу аьнгьа] хIакъиравугу увкуну бивкIшиву.