Ина хъинну баххана хъанахъиссара

Ябувара кьадрулий талихlрал кlутlу тlисса лахlзарду!

Ина хъинну баххана хъанахъиссара, оьрмулий цалчин вилва оьрчl ххира буллалиний, уттиния тинмай ина хьхьичlава бивкlсса куццуйссагу къабикlантlиссара, вияту цамур инсан хьуссар.

Бюхъайссара ина хьхьичlавасса вихва бизаргума хъанан. Вилла оьннасса чlун, тархъаншиву дусса чlумалсса вихва. Буруккин бувансса ишругу чансса чlумалсса, мажалгу биялсса бусса.

Вин бувчlинтlиссар гужну бувххусса чlун цукунссарив. Хьхьичlва тачlав къабувххусса кунма буххайхту. Гьантри бачинтlиссар куннил хъирив кув, циняв цалавхьхьусса кунма. Аьтlаврил, чlивитlун ккукку буллалаврил, подгузникру даххана даврил,чансса шану лавхъсса ягу бувагу къалавхъсса лахlзардал бувцlусса.

Зун ххан бизангу бюхъайссар зува мудан цара-ца бизарсса даву дуллалисса кунма. Амма хъама мабитари… Гьармунил ахир-дазу дикlайссар. Дучlантlиссар ина оьрчlан махъва-махъ ккукку буллусса кьини. Яла му багьтlатl хьуну вил никирацl шанай лякъавантlиссар. 

Дучlантlиссар му кьини

Дучlантlиссар ина шанашисса оьрчlайн махъва-махъсса ппай кусса кьинигу. Ина ца ппурттуву оьрчl карав увцуну занайрахха бусса. Яла дучlантlиссар оьрчl гьаз ан, карав уцин къахъанахъисса кьини.

Кьунниялай зу оьрчl чlири ваннайлуву щинавун учlан уллантlиссару, чурх шюшиншиврул. Ца кьини ганан цанма ччантlиссар цалва чурх цала шюшин. Ганал ка дикlантlиссар вил каниву, ххуллул тийн лахълахъисса ппурттуву. Дучlантlиссар кьини, вихьхьун ка къадуллуну цува лахъайсса. Дяхьхьуниву учlантlиссар вичlан кьинирдал ца кьини, ина цува ххира-ххуй уваншиврул. Ва иш тикрал къахьунсса кьинигу дучlантlиссар. 

Ца кьини ина оьрчlащал архlал тяхъасса балай тlунтlиссара, хlазну сукку-кьютlугу тlий. Яла ина хъуна хьусса арснащал тачlав гукун шадну бала-гьалайлий  къабикlантlиссара. Ганал вийн школалийн ачиннийн ппай учинтlиссар, цаппара хlаллаварив, ламусравун агьлай, ппай маучара ххишала учинтlиссар. Кьинирдал ца кьини ина ганахь хьхьувай махъва-махъ буккинтlиссар магьа, лишинтlиссар гъулуртусса ганал лажин. Ца ппурттувурив га ххарину вил хьунийн къалечинтlиссар. Цува гьаз ува тlий кару къатlитlинссар. 

Иш мунивурхха бусса, зун къакlулссар вай укунсса ттюнгъашивурттал дазу хьунтlиссарив. Амма зун кlулссар, ми талихlрал бувцlусса лахlзарду лещантlишиву, я тикрал къашайшиву, я зана буван.

Мунияту зул оьрчl хъуна шайхту, ганал бикlантlиссар цаламур ххуллу, цаламур оьрму. Ганал оьрмулуву, га чlивинийсса чlумал кунма, ина ганан аьрш-куршлил заллунугу, щалла дунияллул дякюрунугу къабикlантlиссара. Ябувара кьадрулий талихlрал кlутlу тlисса лахlзарду!

Патlимат Рамазанова.