АльхIамрал кьимат
Кьуръандалул сурарду ттуршлий ацIния мукьва буссар, миннуву яла ххирамур Аль-ФатихIари
Иса Омаров
Сура Аль-Фатиха
Кьуръандалул сурарду 114-ва буссар. Миннуву яла ххирамур «Ал-ФатихIари», ЛавхIул-махIфузраву хьхьичIва-хьхьичI чивчусса Кьуръандалул сура мури. Цуппагу Расулуллагь [саллаллагьу алейгьи ва саллям] Маккалий уна ливкссар Аьрширал лувсса ххазиналияту. Цал ялагу Мадиналивгу ливкссар тIийгу бур.
Тавратраву, Инжилдануву, Забурдануву, мунин лавхьхьусса сура бакъассар. Мунил арулва аят буссар. Арулвагу аятгу арулва луттирая кутIа бувссар – Тавратрая, Инжилдания, Забурдания, Кьуръандалия, Адамлул [аьлайгьи салям] улттая, Идрислул [аьлайгьи салям] улттая, Ибрагьимлул [аьлайгьи салям] улттая.
АльхIам буккайманан ми арулвагу бувккуссаксса чиригу буссар. Аллагь Тааьланал ттуршлий мукьва лу ликкан бувссар, ми цинявннул элмугу Кьуръандалуву дуссар. Щалва Кьуръандалулссагу «АлФатихIалуву» дирхьуссар. Му «ФатихIалул» мяъна-тафсир кIулма цинявппа луттирдал мяъна кIулма кунассар. Цал му бувккумагу, циняв луттирду бувккума кунассар.
Аллагь Тааьланал Расулуллагьнан [саллаллагьу алейгьи ва саллям] буллумунива яла ххирамур Кьуръанни, мунивагу яла ххирамур «Ал-ФатихIари». Кьуръандалул аслу-гьану, нину – «Ал-ФатихIари».
Му цуппа чIивинугу, щалва Кьуръандалувусса санаъгу, амругу, нагьюгу, ваъду-ваэдгу, хIукмурдугу муниву буссар. Щалва Кьуръандалия арулва бутIа бувну, ца-ца бутIущал ца-ца аят барабар шайссар. Цал му буккирча щалва Кьуръан бувккуссаксса чири хIасул шайссар.
ХIакьикьатрай мунил мяъна кIул хьурча, махъминнулссагу кIул шайссар. Муниву щалва Кьуръандалул макьасид-мурадру цачIун бувссар. Циняв сурардал, аятирттал нурду-икьтибас дуллалисса муниятури. Дуниявийсса мурадирттал, макьасидирттал ххазинардал хьулурду тIитIаймур мури.
Ахиратлуву мяйвагу Алжаннул хьулурду тIитIаймур мури. Арулвагу дуржагьрал хьулу байщун баймур мури. АпатIру, баларду, мусибатру байщун баймур мури. ХIатта Жабраиллул увкуссар Расулуллагьнахь [саллаллагьу алейгьи ва саллям]: «На нигьа увсун уссияв, вил уммат аьзавраву бикIанссар тIий. Утти, ва «Ал-ФатихIа» ливккукун паракьат хьунна» - куну.
Аьскар ттугълийн ххяххайсса кунма, имандалул агьлу ххяххай кIану мури. Муниву азарда хасият загьирсса дуссар, азарда батIинсса дуссар. Му даин буккайманал инсаннал батIингу загьиргу марцI шайссар, нафсирал, щяйтIаннул апатIирттаятугу имин шайссар. ХIатта гьарца цIуцIаврин дару буссар муниву.
