Родной заснеженный край

Кlива гьантлий бакъавцlуну буллалисса марххалттал,
Лакку кlану кlучl бувуна, магъив чlаланну къатрал. 
Лагьний тlурча так бургъурду чlалай бия къирагърай, 
Леххаврил ттугъру ми хханссар, оьвтlутlисса кумаграйн. 
 
Кlива гьантлий буллай, гьанай, кьурукlи дакъанува
Уттигу буссар буллайнма, бакъаний бишин кунма. 
Къанихшиву занч-марххалттал, зунттурдай буртти бикlан, 
Къазразанну ризкьичитал чlатlри кlунттил дугьан бан. 
 
Тайнна дучри яхl буллай най, марххалттава итххяхлай, 
Лахlлай, багьлай, башттан бюкьлай, багьния бизлай, занай.
Тlабиаьт гьалак дуркшиву бувчlлай, мадад къабуллай, 
Залуннал дакl къума къахьун, чувшиврий кьини лахълай. 
 
Тана ххюнчlа щиллив магъуй кьарчlгу бивкlун микlлачlлай, 
Инсантурайн ливкмур цирив, хьумур цирив къабувчlлай. 
Зунттурдал зурзу-кувкулул дакl хъячин бувсса кьули, 
Ццаххандарал хьуну буссар, оьлил чулухун лякlлай. 
 
Циксса нехру зумардава личинссарив щин кlулли, 
Лахlунттугу тасса-танийн дуцланссарив къакlулли, 
Аьтарттугу, лахlунттугу бяст-ччаллий дурксса кунма, 
Къирмишанну, ччарду дуллай, аьрщи-ххюл муркlа буллай. 
 
Къуллугъчима уссар занай, цlайтlи ттуплив ябуллай, 
Тlабиаьтрал цlунцlиягу касивнайн тlайладацlай. 
Бяравсса бульдозерданул бурхlай тана чак буллай, 
Гьарзатрацlа хьусса инсан, Аллагьнайн щукру буллай. 
 
Аьрщарайн ливксса сситара хlаллицlух лагь хьунтlиссар, 
Чан-чанну тlий дуниялгу, ссавгу чанна хьунтlиссар. 
Щавурдари хьусса аьрщи ва зивзусса зунттурду,
Тlутlан кlутlу тlунтlиссаркьай, дазлай щявсса хъяклурду. 

Патlимат Рамазанова.