Довольство Всевышнего

Некоторые рекомендации к достижению довольства Творца

Аллагь цаятува рязи хьуну къаччисса бусурманчу акъахьунссар, цанчирча инсаннал талихI мунивур бусса.

Оьмур лиххан байсса хъинбала

Идавсил [саллаллагьу аьлайгьи ва саллям] увкуну бур:

«Инава чув ухьурчагу Аллагьная нигьа увсун икIу, гьарца бунагьсса тIул хьуну махъ му лиххан дувансса хъинбала бува, халкьуннащалсса иширттавугу марцIсса, хъинсса хасият ккаккан дулува». (Ат-Тирмизи)

Бухлагаву дакъасса цадакьа

ХIадисраву увкуну бур:

«Адамлул арс (инсан) ивчIайхту, ганал циняв аьмаллу къуртал шайссар, так шанма личIаннин: бухлагаву дакъасса цадакьа, халкьуннан мюнпатран кьадиртсса элму ва ганаха дуаьлийсса оьрчIру». (Ал-Бухари, Муслим, Абу Давуд, Ат-Тирмизи, ан-Нисаи).

Халкьуннан кумаг баву

Идавсил [саллаллагьу аьлайгьи ва саллям] хIадисраву увкуну бур:

«Ва дунияллул буруккинттарая ца бусурманчу ххассал увма Аллагьнал ххассал увантIиссар Кьиямасса кьинилул буруккинттарая. Цана буржлувманал тагьар бигьа дувайманан Аллагьнал бигьа дувантIиссар дунияллийсса ва ахиратравусса тагьар.

Бусурманчунал аьй кIучI дурманал аьй Аллагьнал кIучI дувантIиссар дунияллийгу, ахиратравугу. Аллагьнал цала лагънан кумаг бувайссар, га лагъ цала (диндалул) уссин кумаг буллай ухьурча». (Муслим).

Хъамитайпалул цадакьа баву ласнал хъуслия (ласная ихтияргу ларсун)

Аьишатлул [разияллагьу аьнгьа] бувсун бур МухIаммад Идавсил [саллаллагьу аьлайгьи ва саллям] увкумур:

«ЩинчIав зарал къабиянну цила ласнал хъуслия цадакьа бувайсса щарссанин чири хьунтIиссар. Ласнангу чири хьунтIиссар гай хъус лякъаврихлу. Мукунмасса чири буссар гай ядувайманангу...» (Ал-Бухари, Муслим, Абу Давуд, Ат-Тирмизи, Ан-Насаи ва Ибн Мажагь).

Дахху-ласулуву тIайлашиву

Абу Саэд ал-Худрил [разияллагьу аьнгьу] бувсун бур Идавсил [саллаллагьу аьлайгьи ва саллям] укунсса махъру увкушиву:

«ТIайласса, аьдилсса машачи икIантIиссар (Алжаннаву) идавстурал, салихIинтурал ва шагьидтурал чIарав». (Ат-Тирмизи).

ЧIарав акъаманаха дуаь даву

Абу Дардаълул [разияллагьу аьнгьу] бувсун бур Идавсил [саллаллагьу аьлайгьи ва саллям] хIадис:

«Бусурманчунал цала чIарав акъасса диндалул уссихлу дурсса дуаь кьамулссар, цанчирча, мунал бакIрацI икIайссар хасъсса амру бувну ивтсса малаик. Га инсаннал диндалул уссиха ххуйсса дуаь дуртари малаикнал учайссар: «Амин, винмагу мукунма хьуннав!» - куну». (Муслим).

Нину-ппу рязи баву

ХIадисраву увкуну бур: «Аллагьнал рязишиву дуссар нину ва ппу рязи бавриву» (ТIабарани).

Ххуйсса тарбия дуллуну душру хъуни баву

Ца чIумал Идавсил [саллаллагьу аьлайгьи ва саллям] увкуну бур:

«Шанма душ бусса инсаннал миннай аякьа дуллай, гьарзадрал щаллу буллай, цIимилийну ябуллай ухьурча, му чара бакъа Алжаннавун уххантIиссар». Вай махъру бавсса ца асхIабнал цIувххуну бур: «Я Расулуллагь, кIива душ буманангурив?» - куну. «Ди, кIива буманангур», - увкуссар МухIаммад Идавсил [саллаллагьу аьлайгьи ва саллям].

РухI дусса задрай аякьа даву

Абу Гьурайрая [разияллагьу аьнгьу] бивну бур Идавсил [саллаллагьу аьлайгьи ва саллям] бувсъсса хIадис: «Цала ххуллийх нанисса инсан хъинну мякь хьуну ивкIун ур. Ххуллийсса ца кьуйлувун увххун ганал уччиннин щин хIарчIун дур. Гива уккайхту ганан мякьлил маз чулийн бувтсса ккаччи ккавккун бур. 

«Нава мякьну ивкIсса кунма ва ккаччигу мякьну чIалай бур», - куну, цала ччаннайсса ус лирккун, гара кьуйлувун увххун, ус щинал дурцIуну ккаччи хIачIан бувну бур. 

Му тIул дурнутIий Аллагьнал мунал бунагьру багъишла бивтун бур». Гиккусса халкьуннал цIувххуну бур:

«Я Идавс [саллаллагьу аьлайгьи ва саллям], жанавартран бувмунихгурив чири хьунтIисса?». «Гьарца рухI думунихлу буссар чири», - увкуну бур МухIаммад Идавсил [саллаллагьу аьлайгьи ва саллям].