Циванни барачат бакъасса?

Почему нет бараката? Барачат (баракат) тIисса мукъул мяъна – циняв Аллагьнал неъматру, хъиншивуртту, цIими. Цири дуллан аьркинсса жула хъусливу, кулпатраву, инсантуращалсса арардаву, чурххал цIуллушивруву, оьрчIаву, давурттаву барачат гьарза хьуншиврул?

Циванни барачат бакъасса?
Почему нет бараката?

Почему нет благодати?

Диндалуву личIи дурну дур барачат бишаврил сававру.

1. МарцIсса ният (нанижат)
Даймур-дитаймур барачатну хьуншиврул, дакIнивусса ният марцIсса дикIан аьркинссар. Ният – аьмалданул аслури. ХIадисраву увкуну бур: «Гьарца тIулданун кьимат бищайссар ниятрайн бувну» (Муслим). Мунияту, гьарца давричIа дакIнихтунусса, Аллагьнахлунусса I ният дикIаву хъинну агьамссар.

2. Иман ва Заннаясса нигь
Кьуръандалуву увкуну бур (мяъна): «Тай инсантурал хIакьсса иман дирхьуну, Заннал танмихIрая нигьа бувсун бивкIссания, миннан чара бакъа барачатрал къапурду тIитIинтIиссия ссаврунная ва аьрщарая» («Аль-Аъраф» суралул 96 аят).

3. Таваккал бутаву
МухIаммад Идавсил увкуссар: «Зул дакIурдиву Аллагьнайн I хIакьсса таваккал бивкIссания, Заннал зун барачат булунтIиссия, лелуххантран дукия дулайсса куна: кIюрххил дачIрасса лякьращал левххун лавгун, гьанттайнмай бувччуну зана бикIайсса» (Тирмизи).

4. Кьуръан буккаву
«Ва Кьуръан – барачатсса, ванияр хьхьичI гьан бувминнуву бивкIмур тасттикь буллалисса лури» («Аль-Анъаьм» суралул 92-мур аят).

5. «Бисмиллагь» учаву
Бусурманчувнал гьарца даву дайдишайссар Аллагьнал цIа кIицI ларгун. Мукун дайдирхьумуниву барачат бикIайссар. «Бисмиллагь къаувкуну дайдирхьусса давриву барачат бакъассар», - увкуну бур хIадисраву.

6. ЦачIун хьуну дукра дукаву
Идавсил увкуссар: «ЦачIу дукра дукавриву зун барачатшиву дуссар».

7. Дахху-ласулуву тIайлашиву
ХIадисраву увкуну бур: «Маша буллалисса чIумал дахху ва ласу щялмахъру къабуслай, дахлахисса хъуслил диялдакъашивуртту кьюлтI къадуллай бухьурча, миннал маша барачатсса хьунтIиссар. Щялмахъру буслай, хъуслийсса аьйрду кьюлтI дуллай бухьурча миннал машлуву барачат къабикIантIиссар».

8. Щукру баву
Кьуръандалуву увкуну бур (мяъна): «Зу щукру булларча, На зун неъматру гьарза буванна; щукру къабуварча, Ттул аьзав цIакьссар» («Ибрагьим» суралул, 7-му аят)

9. Садакьа
ХIадисуль-Кьудсилуву Аллагь тIий ур: «Я Адамлул арс, ина харж дува, Нагу вийн харж дуванна». Идавсил увкуссар: «Зула хъус дуруччияра закат буклай, къашайшалт хъин бувара садакьа буллай, балаапатIру байщун бувара дуаь дуллай» (Абу Давуд).

10. Гъанминнащал дахIаву
цIакь даву ХIадисраву тIий бур: «Лахъисса оьрмугу, къатлуву буллугъшивугу ччиманал цала гъан-маччами хъама мабитарача».

11. Ччяни бизаву
МухIаммад Идавсил увкуссар: «КIюрххил ччясса ссятру Аллагьнал ттул умматран барачат бурссар». КIюрххил чаклил чIун дуркIукун, чани хъя чиннин шанан утту бишаву къахъинссар, барачат ласайссар.

12. Кулпат баву
Щарсса дуцаву, кулпат баву – барачат кIункIу бувайсса давури. Кьуръандалуву бувсун бур мискиншиврух къабурувгун кулпат бувайминнан Аллагьнал буллугъшиву дулунтIишиву.

13. Бунагьирттая байщаву 
Барачат бакъашиврул агьаммур багьана – бунагьру баву хъанахъиссар. МухIаммад Идавсил хIадисраву увкуну бур: «… Мяйжаннугу, инсан цанма нясивсса бутIуя махIрум къашайссар, так бувсса бунагьру сававну бакъа». (Муслим) Мунияту, хIарачат бувара Заннал жуйва бивхьумур щаллу буллан, хIараммуния арх буцлан. Хьусса бунагьраягу анаварну тавба дулувара. «Мудан Аллагьнахь багъишла ити тIий лаизлазисса инсаннан гьарца бала-апатIрава, ццахханнарая ххассал хьунсса ххуллу тIитIайссар, хьул бакъасса чулуха буллугъшивугу дияйссар», - увкуну бур хIадисраву.