Коротко про намаз

Чак баврия кутIану

Мусульмансса адиминал ва хъамитайпалул балугъравун бивсса оьрмулия гихунмай чара бакъа буван аьркинсса буржри кьинилун ххюва чак баву.

Чаклил шартIру

ШартI учайссар чак буллай айишиннин ва буллалисса чIумал дуруччин аьркинсса затирттайн, мигу ххюра дуссар:

1. Чаклин ивссуну икIаву;
2. Чурх, янна ва чак бувайсса кIану нажасрая марцIну бикIаву;
3. Аьврат (чара бакъа кIучI буван аьркинсса базурду) кIучI баву;
4. Чаклил чIун дуркIшиву кIул шаву;
5. Кьиблалин лажинну ацIаву.

Ракааьтру

Гьарца чакливу дикIайссар цинна-цинна ккаккан дурсса ракааьтру:

• КIюрххил – кIира, 
• Ахттайннай – мукьра, 
• Ахттакьуннай – мукьра, 
• МаркIачIаннай – шанна, 
• ХъатIаннай – мукьра.

Кьунут

КIюрххил чакливу кIилчинмур ракааьтрай рукуърая гьаз шайхту, дуаь дувайсса чIумал кунна каругу хьхьичIун дургьуну дуккайссар дуаь «Аль-КьунутI» («Магьдина»)

«Магьдина»:

«Аллагьуммагьдини фиман гьадайт, ва аьфини фиман аьфайт, ва таваллани фиман таваллайт, ва барик ли фима аътIайт. Вa кьини бирахIматика шарра ма кьазайт, фаиннака такьзи валя юкьза аьляйк. Вa иннагьу ля язиллю ман валайт, ва ля яиззу ман аьдайт. Табаракта Раббана ва тааьляйт. ФалакальхIамду аьла ма кьазайт. Астагъфирука ва атубу илайк. Ва саллаЛлагьу Тааьла ва саллама аьла хайри халкьигьи МухIаммадин ва аьля алигьи ва асхабигьи ажмаин. Рабби-гъфир ва-рхIам ва анта хайру-р-рахIимин».

Чаклил рукнурду

Чаклил рукнурду (чара бакъа дуван аьркинмур) 13 дуссар:

1.  Ният даву.
2. «Аллагьу акбар» учаву.
3. «АльхIам» буккаву.
4. «АльхIам» буккайни ивзун ацIаву.
5. «Рукуъ» баву.
6. «Рукуърая» гьаз шаву.
7. Сужда баву.
8. КIивагу суждалул дянив щяикIаву.
9. «АттахIияту» буккаву.
10. «АттахIияту» буккайни щяикIаву.
11. «АттахIиятулул» хъирив Салават дутаву.
12. Салам булаву.
13. Рукнурдал низам дуруччаву (хьхьичI-хъирив даву)

Аллагьнал кумаг баннав!