Цукунни къаччангу къабивкIун оьрму бутантIисса?

Ва суал хIасул хъанай бур цала мачча-гъаннащалсса арардал пикри бусcа цумацагу инсаннал бакIраву

Цукунни къаччангу къабивкIун оьрму бутантIисса?
Цукунни къаччангу къабивкIун оьрму бутантIисса?

Оьрмулуву шай къаччан бикIансса ишру, амма хьунабакьай мюрш-кьюршсса затирттайнгума къаччан бикIлакIисса инсантал

Мукунсса хасият хъамитайпалул душиву гьарцаннан кIулли. Арамтуравурив му хасият хьунадакьай нажагь. ХIакьсса адаминаву мукунсса хьхьарашиву дикIан къалайкьссар. Хъами гьарца кьини къаччан бивкIунмасса бур. Къаччан бикIаврил сававртту чIярур. Ца-ца чIумал лултту-ялтту гьан бувансса мукъуйн ягу иширайнгума къаччан бикIай. ХIарачат бувара дурчIин къаччан бикIаврил тIабиаьт. Мунил буссар кIива жура.

Цалчинмур ляхъайссар багьана бакъасса нигьачIаврия: тIайлабакъасса пикрирдая, дакI мяшшивруя, ягу зума-ккарччулусса къащилуя. КIилчинмур – му бур цанна хасъсса «къарши бацIаврил акция». Цува рязи акъашиву ягу оьхIалшиву тIайлану цукун ккаккан дуванссарив къакIулну инсан айишай къаччан бикIлай.

Лаласияра къаччан бикIаврийну зул мурад щаллу къахьунтIиссар. Къаччан бикIаву зула мурад бартбигьинсса ярагъну ишла дулларча, зул дянивсса арарду хъиннура зия хьунтIиссар.

Къаччан бикIайсса хъамитайпалия адаминал дакIний тIааьн бакъасса асарду личIайссар: ганан даим цайва тахсир чIаларчагу, къабувчлачIиссар цалла ци къел дурссарив. Цува-ца цала хIурмат бусса жагьилнаща къабюхъантIиссар хъунмасса хIаллай стрессраву икIан. Мунияту, агарда винма ччай бакъахьурча вина ччисса инсаннацIа хьун, даххана дува вила тIуллу. Гьаваллавусса пикрирду цивппа битияра, адаминагу роботран ккалли маулларду.

Зуща къахьунтIиссар ганал тIуллал программа сакин дуван, га – тархъансса инсанни, ганахь дуссар цанма ччимур бувансса ихтияр. Амма вил биялар инавагу баххана хьун, вила тIуллугу даххана дуван. Вила ялув зузу, мунин харж бува вила гьавас, тагьар ххуйчулиннай даххана хьунтIиссар. Къаччан бикIавуртту цачIун мадулларду, тархъан шияра миннуя. Паракьатну, аьщуйн щуну кIицI дувара ми ласнахь.

Зунмагу хьунабакьайхьунссар мюрш-кьюршсса затурттил цIаний куннайн ку къаччан бивкIсса. Мукунсса тагьар бюхъайссар шиннардийгума лахъи лаган, оьрчIру нитти-буттащал, дустал дустуращал гъалгъа къатIий. Ялагу мукунсса ишираву къаххуйсса ци бур учирча, къаччан бикIавугу ляливну, винма дакьил хьун ччисса инсан сагъну акъашиву. Психологтурал пикрилийн бувну, му захIматсса тагьарди, мунива укканнин шинну ларгун лякъайссар. Къаччан бикIаврил ялун чIяруну ххи шайссар инсан хъиннува хIасратрал угьан уллалисса тахсирлувшиву.

Мукунсса ишру дянив къабагьаншиврул аьркинссар къаччан бикIавуртту леща-лекьа дуван. Мукун къабюхълай бухьурча, хIарачат бувара хIала-гьурттуну бикIан так зула дакIнин щун къабувайсса инсантуращал. ДикIайссар тагьар цайми инсантал зувугу мукунмасса асарду чантI учин буллалисса. Ми бикIан бюхъайссар зунма ччя-ччяни ккаклакисса даврил уртакьтал хьуннав, хIатта маччагъанмигума. БувчIин аьркинссар ва оьрмулуву цинявппа инсантал бакъашиву мяърипат ларайсса, къалмакъал къадурну, инсаннал дакIнин щун къабувну, инсан кьюкьин къаувну, бацIан шайсса.

Мунияту хъинну агьамссар вила инава угьан бюхъаву. Цимурца къюкIливух итабакьлай ялапар хьун къашайссар. ДакIний битияра, гьарзадрал камилсса инсан икIан къабюхъайссар, инсанная так ххуймуних ялугьлангу къабучIиссар.

Ихтилат ичIаллил иширттая бухьурча, му чIумал аьркинссар къаччан бивкIун вивуна инава къалавгун, мунинсса жаваб дулун. ЧIявумур чIумал цала лагма цинявннан къаччан бикIан буван хIарачатрайсса инсантал мукун зун бикIайссар цанна жаваб къадулунсса ххай, му чIумал вихьхьун дириллалиссар ххаллилсса сант цайминнан буван ччимур цанма асар хьун бувансса.

Цамур чIумал, къаччан бикIаннин пикри бувара, вин му ссан аьркинссарив, винма мунийну шаймур цирив. Зула зува кьуцIу буллалаврийну буруккин щаллу хьун тIий бурив? Ягу зия дурсса макьулул ялун зула зува кьуцIу буллалаврил чаннасса пикрирду бугъ буван тIий бурив? Агарда, къаччан бикIаву вила мурадру бартбигьинсса ярагъну ишла буллай ина акъахьурча.

Ас-Салам кказит: 11/2018