Кьурбаннул кьинилул ххирашиву

Достоинство дня курбан-байрам

Кьурбаннул кьини – Эд-аль-АдхIа – хъанахъиссар мусульманнал яла хъунмур байран. Мунияр хьхьичIсса кьини Аьрафатрал кьинири. Мунил хъиривсса шанма гьантлуйн (11-мур, 12-мур, 13-мур кьини) учайссар «ташрикьрал гьантри» куну.

Аьрафатрал кьини кIюрххил чаклияту байбивхьуну гьарца чаклил хъирив фаризасса бикIу, ссуннатсса бикIу, жаназалул чаклил, хъирив лавхъун буллалисса чаклил хъирив бикIу такбир бишаву суннатссар 3-мур ташрикьрал кьини ахттакьун чак буваннин.

Такбиргу вари:

«Аллагьу акбар. Аллагьу акбар. Аллагьу акбар. Ла илагьа илла ллагьу ва ллагьу акбар. Аллагьу акбар ва лиллагьил хIамд. Аллагьу акбар. Аллагьу акбар. Аллагьу акбар. Ла илагьа илла ллагьу ва ллагьу акбар. Аллагьу акбар ва лиллагьил хIамд. Аллагьу акбар. Аллагьу акбар. Аллагьу акбар. Аллагьу акбар кабиран, валь-хIамдулиллагьи касиран, ва субхIаналлагьи букратан ва асила. Ла илагьа илла ллагьу ва ллагьу акбар. Аллагьу акбар ва лиллагьил хIамд».

Мукун биширча, мунил бувцири бунагьру яла гьан бувайссар. Аьрафалул кьини баргъ лавгун махъ кIичIирттаву, мизитирттаву лахъсса чIуний бюхттулну бишавугу суннатссар, эдрал чак булланнин. ХIажлив уманал такбир къабивхьуну «лаббайк» учайссар. Мукун лахъсса чIуний такбир бишаву хъанахъиссар га шяраву ягу шагьрулий мусульман ялапар хъанай бушиврул лишан. Мува такбир бишайссар Кьурбанналул кьини ва ташрикьрал гьантрай гьарца фари засса чаклил хъиривгу.

Кьурбан-байранналул хьхьу эбадат дуллай уттара дувавугу хъинссар, суннатссар. Щалла хьхьу уттара дуван къашайманал шайссаксса дуванссар. Мугу къашайманал хъатIан чак ва кIюрххил чак мизитраву жамааьтрай буван хIарачат бувача. 

Хьхьу дачIи хьуну махъ байранналул чаклийн ачиннин чурх шюшавугу хъинссар «На ният дував суннатсса гъуслу буван (чурх шюшин), Кьурбан-байранналун хас бувну, Аллагьу акбар» – куну нийятгу дурну. Кьурбаннул кьини чани дурккун махъ, байранналул чак буваннин дукра къадукавугу суннатссар.

Кьурбанналул кьини – хъинну ххирасса кьинири. Му кьини садакьа баврил, хъинбала баврил, хаснува Кьурбан бивххун оь итабакьаврил чирирду ва даражартту чIявуссар. Му кьини 300-ва «СубхIанаЛлагьи ва бихIамдигьи» увкуну, мунил чири ливтIусса мусульманнан булурча, гьарца гьаттавун азарда нур духхайссар, цува ивкIукун цалла гьаттавугу азарда нур дикIантIиссар.

«НАСИХIАТУЛЬ-АЬВАМ» («ГЬУНЧIУКЬАТIАН») ТIИССА ЛУТТИРАВА