Мюнпатсса дуаьрду
Полезные дуа, дуа от сглаза, дуа для защиты имущества на лакском языке
Мухаммад Алиев
1. Я къалачIун дуккайсса дуаь
Я циван лачIайссарив, мунил тIабиаьт цукунссарив уттигу балжину кIул хьуну бакъар. Аммарив, диндалул тасттикь буллай бур я лачIаврия зарал биян бюхъайшиву.
Мубараксса Кьуръандалуву увкуну бур (мяъна): «ХIакьну, чапуртал хIадурну буссар ина цала ярунних бивтун утан, гайннан Кьуръан ккалаккима ккаккарча учайссар: «Ва мяйжаннугу жиндрал хьуну ур!» Амма ва дуниял-аьламрансса насихIатри». («Аль-Калам» суралул 51-52аятру).
Идавсил ﷺ ца хIадисраву тIий бур: «Я лачIайшиву мяйжанссар (тIайлассар)» (аль-Бухари). Цамур хIадисраву бувсун бур ца чIумал Идавсин ﷺ лажин хъахъи ларгсса инсан ккавккукун увкуну бур: «Ванаха дуаь дуллали, ванай я лавчIун бурча» (аль-Бухари).
Я лавчIсса чIумал МухIаммад Идавсил ﷺ буккайсса бивкIссар «аль-Фалакь» ва «ан-Нас» сурарду (Наси-фалакьи). Ми сурардайн учайссар «муаьввизатайн». Расулуллагьнал ﷺ цала асхабтурахьгу вай сурарду буккияра учайсса бивкIссар. Цала душнил арсру ХIасан ва ХIусайн я лачIаврия буруччиншиврул Идавсил ﷺ укунсса дуаь дуккайсса диркIссар:
أُعِيذُكُمَا بِكَلِمَاتِ اللهِ التَّامَّةِ مِنْ كُلِّ شَيْطَانٍ ، وَهَامَّةٍ ، وَمِنْ كُلِّ عَيْنٍ لَامَّةٍ
«Уизукума бикалимати-Ллагьи т-таммати мин кулли шайтIанин ва гьамматин ва мин кулли аьйнин ламматин»
Мяъна: «На Аллагьнахь чIа тIий ура зу буруччаву щяйтIантрая, зарал баймуния ва я лачIаврия» (аль-Бухари, ибн Мажагь).
2. Хъус ядуваншиврул дуккайсса дуаь
Бала-апатIрая, арцу-хъус дакъа шаврия урувччусса цучIав акъассар, мунияту кьатIув буккайтари зула къатлуву думур: кулпат-оьрчIру, хъус, цуппа къатта Аллагьнайн тапшур булувара.
Ибну Оьмардул [разияллагьу аьнгьу] бувсун бур Идавсил ﷺ увкумур: «Ци-дунугу ядуван АллагьначIа кьадитарча, Аллагьнал му зад дуруччайссар» (АхIмад). Мунияту, цала хъус ядуван ччисса бусурманчувнал ва дуаь дуккин аьркинссар:
«Аллагьумма инни аставдиоька гьазаль макан ва ман фигьи ва ма фигьи»
Мяъна: «Я Аллагь, на Вийн тапшур (аманат) буллай ура ва кIану, шиккусса инсантал ва шикку думур».
