Щарсса

УвкIун ур муинсан маслихIат ккаккан. Халифнал [разияллагьу аьнгьу] къапулучIан ивукун, ганан бавну бур дяъвайсса Оьмардул [разияллагьу аьнгьу] щарссанил лахъсса чIу. Му иш ккавккукун, га адимина зана ивкIун махъунай авчуну ур, халифнал тагьаргу цаламур куннасса ляркъуну, танаща цанма кумаг буван къахьунссар тIисса пикрилий.

Оьмардун [разияллагьу аьнгьу] га хIисав хьуну, оьвкуну, ци мурадрай най уссияв куну цIувххуну бур. Бувсун бур щарссанищал дакьлай дакъашиву:

«Амма ттун чIалачIиссаксса вилмур ишгу мукунма бур, мунияту на ачинна», – куну бур хъамаличунал.

Микку Оьмардул [разияллагьу аьнгьу] ганан бувчIин бувну бур щарсса цайнма гьужумру буллай циван диртссарив:

«Ванил ттун дукра дувай, ттул янна шюшай, ттул оьрчIах дуругай, мунияту ттун вай давуртту дуллансса инсан арцух угьан багьлай бакъар. Му бакъассагу, ванил ттул дакI паракьат дувай, на бунагьсса ва духIин дакъасса тIуллу даврия уруччара. Муниятура на ссавур дуллалисса. Укунсса иширттаву инагу ссавур дулува, щарссанил чулиннайсса аьдилшиву дуручча», – куну.

На ва бусалалийну хъаннил дуллалисса циняв тIааьн дакъасса къеллу духIан аьркинссар учин ччай акъара. Хъаннингу кIулну бикIан аьркинссар цивппа макьу даркьуну бакъахьурчагу маз ита бакьин къабучIишиву.

Аммарив ласнангу щарссанингу хъама битан къабучIиссар гьарца чулуха камилсса ва щаллусса цучIав къаикIайшиву. Ва бусалалул бувчIин буллалиссар ташу-кулпатрал мяъна: ласнал щарссаних, щарссанил ласнах багьайсса хIурмат баву, куннан ку бувчIаву ва махъунмай шаву – хьхьарашиврун ккалли дуллан къабучIишиву.