Джаназа намаз

Жаназалул чаклия

Бусурмансса инсан ивкIукун, адимина икIу, щарсса дикIу, чIивисса икIу, хъунасса икIу, жаназалул чак буван аьркинссар. Му фарз-улькифая хъанахъиссар, цаннал буварчагу гьарцанная яла лагайссар, бувагу къабуварча, циняв бунагьралун багьайссар. ХIатта бувансса ца акъа акъахьурча, мунал буван фаризассар. Къабуварча мури бунагьралу личIантIисса.

Му бувайссагу ивкIума ивссуну, марцI увну, суру бивхьукунни. Мунияр хьхьичI буван къабучIиссар. Уччиннин бувангу ялувссар, къабувнува уччирча бунагьралун багьайссар. Яла гьаттай буван аьркинссар. ХIакьну чапуртуращал иллай ивкIусса хIакьсса гъазинаятугу, уттавашиврул аьламат загьир къархьуну бивкIунма бувсса оьрчIаятугу къабувайссар. Лякьлуву ряхва барз хьуну махъ бувсса оьрчIаяту бивкIуну бунугу бувайссар тIисса аьлимталгу бур. ЧIявусса жаназарттаха ца чак бувангу бучIиссар. Гъурбатрай, кьатIув, цамур шяраву, шагьрулий ливтIуминнаягу буван бучIиссар, суннатссар. Жяматрай бавугу суннатссар. Имамшиву дувангу яла мунан гъанма хъинссар: ппу, арс яла миннал хъиривма. Ми кIулсса бакъахьурча, элму дурккусса адиминал бувну хъинссар. Му чак буваймагу чаклингу ивссуну, аьвратгу кIучI дурну, нажасрая марцIгу хьуну икIан аьркинссар. Жаназалийгу мунил ялун дуртсса задрайгу, хIатта му дирхьусса чурттуйгу нажас дуну буван къабучIиссар. Жаназа хьхьичI дирхьуну, Кьиблалийн лажинну авцIуну бувайссар. Адимина ухьурча бакIрачIа ацIанссар, щарсса духьурча бухчIинссаннучIа ацIанссар.

Чак бувансса адимина акъахьурча, хъаннил бувангу бучIиссар. ОьрчIал бувнугу гьашиву дувайссар, тамийз бусса ухьурча (оьмур-хъинмур личIи буван бюхъайсса оьрмулувун ивсса). Жаназалул чак чIявуссаннал бувссаксса чири хъунмассар, ивкIуманан мюнпат гьарзассар. ХIатта Идавсил саллаллагьу алейгьи ва саллям, мукьцIала инсан иял хьуннин ссавур дайва тIий бур, миннаву цаягу дуаь кьамулсса икIайну тIий. Аммарив уччин чIал хъанай бухьурча, халкь батIиннин ссавур къадувайссар. Жаназалул чак бувайний къаивкIун, яла ялун ивманалгу буван бучIиссар. Жяматрай бувайний шанма ща бавугу суннатссар, шан-шама ацIлай буварчагу.

Жаназалул чак бувайсса куц

Цал ният дувайссар:

«На ният дурунни ва пуланная фаризасса жаназалул чак буван, хъунасса Заннан Аллагьу Акбар» - куну бахIинссар. Мунал цIа къакIулхьурча ва жаназалия куну чирчагу гьассар. Яла АлхIам буккинссар. Ялагу «Аллагьу Акбар» - куну, салават дутанссар. Ялагу «Аллагьу Акбар» куну ва дуаь дуккинссар:

«Аллагьумма-гъфи лихIаййина, ва маййитина, ва шагьидина, ва гъаибина, ва сагъирина ва кабирина, ва закарина ва унсана. Аллагьумма ман ахIъяйтагьу минна фаахIйигьи аьля-ль-Ислям, ва ман таваффайтагьу минна фа-таваффагьу аьля-ль-Иман.»

Ялагу «Аллагьу Акбар» куну, каругу гьаз дурну «Аллагьумма ля тахIримна ажрагьу (гьа, гьум) ва ля тафтинна баъдагьу (гьа, гьум) вагъфир ляна ва лягьу (гьа, гьум)» учинссар.

Яла салам булунссар «Ас-Саляму аьляйкум ва рахIматуллагьи ва баракатугь» - куну, бакIгу цал урчIамур яла куямур чулиннай кIура даен дурну. Яла ивкIуманаха дуаь дувайссар.

(«ГЬУНЧIУКЬАТIАН») луттирая.