Достоинство чтения салавата

Салаватрал ххирашиву

Идавсин [саллаллагьу алейгьи ва саллям] салават дутаву - тIааьтирттал яла ххираминниятур, кьурубатирттал яла хъуниминниятур, макьаматирттал яла лавайминниятур, хIалатирттал яла ххуйминдиятур. Му дутаврил даражалул бюхттулшивугу, мунил кьадру-кьиматгу, чиригу Аллагьнан бакъа къакIулссар. ХIатта, ца ссалават Идавсия саллаллагьу аьлайгьи ва саллям, дутарча, ацIра Аллагьнал, ацIра малаиктуврал, ацIра цалла Расулуллагьнал саллаллагьу аьлайгьи ва саллям, му дуртманаятугу дутайссар, ацIва даража бюхттул байссар, ацIва хатIа яла гьан байссар. Гьарца задрал муная салават дутайссар. АцIра салават кIюрххил, ацIра кьуннияллай дутаварча, Кьиямасса Кьинилул ццахханнарая уруччайссар, бивкIулучIасса инжитшиву бигьа дайссар, идавстуращал, сиддийкьинтуращал изангу антIиссар, сиратIрал ламуйх лахъайний Идавсил саллаллагьу аьлайгьи ва саллям, кагу дугьантIиссар, Идавсил ХIавзрая хIачIангу антIиссар, мунал шафааьтгу биянтIиссар.

Аллагьу Тааьланал ляхъан бувсса цавай малаиктал буссар мусил кьаламругу, арцул чагъардугу канихьсса, Идавсиятугу саллаллагьу аьлайгьи ва саллям, мунал агьулданиятугу салават дутаймий бакъа къачичайсса. Идавсия саллаллагьу аьлайгьи ва саллям, салават дуртътари гьарицаннин ца-ца малаик ляхъан айссар, ца хъа машрикьрайн, ца хъа магърибрайн дирсса. Ми малаиктал Кьиямасса Кьини дучIаннин муная салават дутлай бикIайссар.

Муъминчувнал Идавсия саллаллагьу аьлайгьи ва саллям, салават дуртукун, Идавсил саллаллагьу аьлайгьи ва саллям, гьаттай ца малаик уссар, му малаикнал ларсун му салават, мунал гьаттайн диян дурну учайссар:

«Я МухIаммад, вилва умматиндаятусса пуланнал арснал пуланнал вияту салават дуртунни», – куну.

Расулуллагьналгу саллаллагьу аьлайгьи ва саллям, учайссар:

«Инагу мунан ттуяту ацIра салаватгу диян да, ттул шафааьт цанма хIалал хьушивугу буси», – куну.

Яла, му малаик лавхъун Аьршрайн учайссар:

«Я Рабби, пуланнал арснал пуланнал Вил ххираманая ссалават дуртунни» – куну. Аллагьналгу учайссар: «Инагу мунайн ттуяту ацIра салават диян да», – куну. Яла Аллагьнал ляхъан байссар мунил хIарпирдал бакIрахсса малаиктал, гьарцанналгу шанттуршлий ряхцIалла бакI дусса, гьарца бакIравугу шанттуршлий ряхцIалла лажин дусса, гьарца лажиндаравугу шанттуршлий ряхцIалва кьацI бусса, гьарца кьацIливугу шанттуршлий ряхцIалва маз бусса, гьарца мазралгу Аллагьнаха I санаъ дуллалиссар личIи-личIийсса журардай шанттуршлий ряхцIалда шинай. Миннул цинявннул чиригу Кьиямасса Кьини дияннин му ссалават дуртнаха чичлачиссар.