ХIусутшиврул ва оьхIалшиврул инсаннал бакIрачIан буцаймур

Инсаннал дакI мяш хъанай дур Хъунасса Заннал цаманан хъус-хъиншиву нясив дуркун. Му чIумал мунан ччай бур му инсан цимурцаннуцIа хьуну. ХIусутшиву – му дур инсаннал инсаннащал душманшиву, оьхIалшиву дуну сситул хьусса чIун.

ДакIниву хIусудшиву дусса инсан – му тIайла акъасса, рахIму-цIими бакъасса, цучIав багъишла къаитайсса ва паракьатну къаитайсса инсанни.

МухIаммад Идавсил, саллаллагьу аьлайгьи ва саллям, исват бувсса куццуй, хъунмурчIин бунагьру хъанай бур шанна хасият сававну: «Шанма багьана бур бунагьру буллалисса, мунияту хIарачат бувара миннуя арх буцансса. бурувччуну бикIияра дакIхъуншиврия, му хасиятралли иблис Заннайн мютIий къавхьуну, Адамлуйн, аьлайгьи салям, сужда буван рязий хьун къабивтсса. Бурувччуну бикIияра дакIнийн багьмур бавриягу, муна мукунсса хасиятрайнур Адамлул, аьлайгьи салям, Алжаннаву къадагъа дирхьусса мурхьирая ахъулсса дуркусса. Бурувччуну бикIияра хIусудшиврия, дакIнил бахилшиврия цанчирча, Адамлул, аьлайгьи салям, арсурваврава цаннал Кьабиллул (Каин) дакI мяшъшиврулли цала уссу Гьабил (Авель)  оьрмулуцIа увсса».

Хъунасса Заннал Сулайман Идавсил, аьлайгьи салям, дакI аьчух дурну: «ТачIав Ттул дакIмарцIсса лагътурай гъибат мабишара ва цукунчIав Ттул лагътурай мяш машара», - куну бур.

Мукунма, ванил хIакъираву салихIинтуравасса цаннал увкуну бур: «Хъунасса Заннал цала лагънайн рахIму бакъасса душман гьус уван ччан бикIарчан, мунайн тIайла уккайссар цIими бакъасса, хIусудшиву дусса инсан».

ХIусудшиврул дирчIан дувайссар инсаннал дин, дакI чарийн дуккан дурну, цIаннавун дахьлаган дувайссар.

Аллагьнал Идавсил, саллаллагьу аьлайгьи ва саллям, увкуну бур: «Мяйжаннугу, зуйнгу дирну дур хьхьичIавасса умматрал азарду: хIусудшиву ва оьхIалшиву. Миннул чIарарду дакъарча, динни ххартI дувайсса». Мунияту аьрифунтуравасса (Занная ларайсса даражалул кIулшивуртту дума) цаннал увкуну бур: «Хъунасса Заннал шама журасса инсантурал миннатру, дуаьртту кьамул къадувайссар: хIарамну ляркъумур дукайманал, халкьуннай бакъу бишайманал ва оьхIалсса, хIусудсса хасият думанал»

Аллагьнал мукунсса лагътурал миннатру кьамул къабаврил чулухасса акьилшивугу – ми Заннал буллусса кьадар-кьисматрая рязий бакъашивруву дур.

Мукунсса инсантуращал къуццу бувансса куц

Идавсил, саллаллагьу аьлайгьи ва саллям, асхIабтурал бувчIин бувну бур, хIусуд шиув дусса инсан ссаячIав рязий уван къашайшиву. Мукун, Муаьвия асхIабнал кIицI лавгун бур: «ХIусудсса инсан личIаннин, ччима инсан дакIнил ласун бюхъайшиву, цанчирча му цаманан оьбала-оьхIалшиву хьуну, Заннал буллусса неъмартирттацIа хьувкун акъа рахIат къашайсса уну тIий». Мукунма, буслай бур имам аш-Шафинал, разияллагьу аьнгьу, увкусса махъру: «Умуд бур цукунсса духьурчангу душманшиву дух дуван бюхъанссар тIисса, так ца хIусудшиву дусса инсаннал дакIниймур личIаннин».

Аькьилсса инсантурал насихIатрайну, исват хьунни ци дулларчангу, хIусудшиву дусса инсаннащал дакIнихтунусса нахIу-хIалимсса ара дуван къашайшиву.

Миннал учайва: «Вила инава азурда машара, хIусудсса, бахилсса инсантурал вихшала лайкь дуллай, миннащал тачIав дакIнихтунусса дахIаву дуван къашайссар. Нажагьлий инава, мукунсса инсантурая урувччуну икIан ччарча, хIарачат бува кьюлтI дуван минная вила ххаришиву ва хъинбалахъиншивуртту».

«БЛАГОНРАВИЕ ПРАВЕДНИКОВ» ТIИССА ДАГЪУСТТАННАЛ МУФТИЙ АХIМАД-ХIАЖИ АЬБДУЛАЕВЛУЛ ЛУТТИРАВА