Кьуръандалул гьарца суралул даража хъинну лахъссар

Щак бакъа, Кьуръандалул гьарца суралул даража хъинну лахъссар, кьимат бищун къашайссар. Цанчирча, му бунутIий Аллагь Тааьланал – дуниял-аьлам ляхъан бувсса Заннал калам.

Гьарца аятраву кьюлтI дурну дуссар дазу-зума дакъасса хIикматшиву. Кьуръандалух къулагъас даву, му буккаву, муниву ккаккан бувсса ххуллу бугьаву – хъинну агьамшиву ларайсса ишри, дакIниву иман думанал цала оьрмулул низамну хьун буван аьркинсса.

МухIаммад Идавсил [саллаллагьу алейгьи ва саллям] ца-цавай Кьуръандалул сурардах ляличIисса къулагъас дувайсса диркIссар. Хаснува, чIявуну «Аль-Мульк» («Табарака») буккайсса бивкIссар.

Му суралул даражалуя бувсун бур имам Тирмизил сакин бувсса луттиравусса хIадисраву:

«Кьуръандалуву буссар 30 аят дусса сура. Му буккайманаха мунил шафааьт бувантIиссар, сайки циняв бунагьру багъишла битаннин. Му «Аль-Мульк» тIисса сурари».

Ибну Масъудлуясса хIадисраву увкуну бур: «Гьарца хьхьуну «Табарака» буккайма гьаттал аьзаврая ххассал хьунтIиссар. Идавсил [саллаллагьу алейгьи ва саллям] заманнай жу му суралийн учайссия ‘’буруччаймур’’» (Ан-Насаи).

Слушать суру «‎Аль-Мульк»‎ (Табарака). Чтец - Аль-Афаси, Мишари Рашид.