Алжаннул кIулли

Ключи от Рая.

Тамансса аятирттаву ва хIадисирттаву бувсун бур Алжаннуя ва мивун буххан лайкьминная. Бур бувсун Алжаннул багъирдал исвагьишиву инсаннал аькьлулун бувчIин шаймунил дазурдаву дакъашиву.

Бачияра Кьуръандалувун ва хIадисирттал луттирдавун бурувгун, ххал буваннуча Алжаннаву уххан ччиманал ци дуллан аьркинссарив!

Ссуннат-чакру
Жунма кIулли бусурмансса инсаннал бурж хъанахъишиву кьинилун ххюва фаризасса (буржсса) чак баву. ХIадисирттаву бувсун бур суннатсса чакру бувайминнан Алжаннаву къатри дувантIишиву.

Дуаь
Имам Тирмизил хIадисраву увкуну бур: «Шамилва Аллагьнахь I Алжан чIа учирча, Алжаннул цила учайссар ‘’Я Аллагь, ити му уххан!’’. Шамилва дуржагьрая ххассал шаву чIа учирча, дуржагьрал учайссар: ‘’Я Аллагь, му ххассал ува цIарая!’’».

Шагьадат
Имам Абу Давудлул бувцусса хIадисраву бувсун бур дунияллия гьаннин шагьадатрал махъру зумух лавсъсса инсан чара бакъа Алжаннавун уххантIишиву. Ми махъругу «Ашгьаду ан ля илагьа иллаЛлагь ва ашгьаду анна МухIаммадан расулуллагь».

Гъанминнащал дахIаву
Гъан-маччаминнал дянивсса арарду цIакь баву хъинну агьамсса ишри. Ва дунияллул авазалуву хъама битан къабучIиссар ляхъиннащалсса аралугърал Исламраву хъунмасса кIану бугьлагьишиву. Идавсил ﷺ увкуну бур: «Маччаминнащал хIала-гьурттушин кьукьин дурма Алжаннавун къауххантIиссар» (аль-Бухари).

Хъинсса хасият
Идавсил ﷺ увкуссар: «Цува тIайлану унува бяст кьабитайманан Алжаннул зуманив къатри дулунтIиссар. Хъярч буллалини щялмахъ хIала къабувайманан Алжаннул дянив къатри дулунтIиссар. Цала хасият ххуй дурманан Алжаннул мицIлий къатри дулунтIиссар». (Абу Давуд)

Жунма къакIулссар
ЗанначIан та зана бикIантIиссарув, амма му чIун дуркIукун, Алжаннул багъирдавун буххан буванминнавух хьун цуманан къаччанссар?!