Первое за что будет спрошен человек

Инсаннал цалчинмур жаваб ссахлу дулунтIиссар

Гьарца инсан жаваблувссар Аллагьнал мунай бивхьусса буюрду биттур баврихлу, цала кашилух бурувгун. Мукун бухьувкун, Кьиямасса кьинигу ми гьарзадрах жаваб дулун багьантIиссар. Балугъравун ивсса оьрмулия шинай оьрмулул ахирданийн ияннин дурсса тIуллахлу, увкусса мукъурттихлу цIуххаву дувантIиссар ахиратлуву. ХIисаб-суал къуртал къавхьуссаксса Аьрасалул арияту къагьантIиссар инсан.

Абу Барзатлуясса хIадисраву бувсун бур МухIаммад Идавсил, саллаллагьу аьлайгьи ва саллям, увкумур: «Кьиямасса кьини Аллагьнал лагъ цува усса кIанттава сукку къахьунтIиссар хIисав къадурссаксса: оьрмулия – цукун, ци дуллай бувтссарив, элму-кIулшилия – ссан ишла дурссарив, хъуслия – цукун ляхълай ва харж дуллай ивкIссарив, чурххая – ссан ишла буллай ивкIссарив» (Ат-Тирмизи).

Жува бувтсса оьрмулия бакъасса, цIуххаву дувантIиссар жунма дунияллий буллусса неъматирттая. Му бакъассагу жаваб дулун багьантIиссар жула оьрчIрукулпатирттахлу ва кьажимшиврулу бивкIминнахлу.

КутIану учин, инсаннал жаваб дулунтIиссар гьарзадрахлу. Аммарив, Кьиямасса кьини цалчинмур цIуххаву дикIантIиссар чаклия, цанчирча, чак бунутIий диндалул ттарцI ва циняв фаризарттава яла агьаммур. Му дикIантIиссар хъинну балжисса, цичIав лях кьакъадиртун дуллалисса хIисаб. Ххал бувантIиссар цукун бувну бурив гьарца чак, чакливусса рукуъ-сужда, чаклин биссаву, дакIниву хIузур бушиву.

Абу Гьурайрал бувсусса хIадисраву бувсун бур Идавсил, саллаллагьу аьлайгьи ва саллям, укунсса махъру: «Мяйжаннугу, Кьиямасса кьини хIисаб дуллалисса чIумал цалчин цIуххинтIиссар чаклия. Чакру багьайкун буллай ивкIун лякъирча, инсан талихIрайн уккантIиссар. Акъахьурча, алши бакъаминнавух хьунтIиссар. Фаризасса чакурдиву диялдакъашивуртту лякъирча, Заннал учинтIиссар малаиктурахь: «Буругияра ва Ттул лагънал дурну дурив ци-дунугу чири хьунсса тIул?» Дурну диркIхьурча, миннуйну щаллу дувантIиссар чакливусса аьйб-гъалатIру. Яла гайми аьмаллугу мукунма хIисав бувантIиссар». (ат-Тирмизи, Абудавуд, Ибну Мажагь).

Гьарцаннан мяълумсса зад бур, шагьадат дуртун махъ инсаннан яла агьаммур зад бушиву чак баву. Мусульманчув уттавану ва бакIрал сагъну уссаксса, мунал буржри чак баву.

ОьрчI балугъ шайхту ягу му оьрмулувун ивманал Ислам кьамул дувайхту, миннал чара бакъа анаварну лахьхьин аьркинссар тIайлану иссаву ва чак бувайсса куц.

Щаллуну чак буван лавхьхьуну бакъахьурчагума, цанма кIулсса, цащава шайсса куццуй буллан аьркинссар.

Чак баву бурж бушиву гьарцаннан кIулсса зад бур, амма хIакьинусса кьинигу чансса бакъар оьрмулухун цивппа мусульманталлугу тIий, амма чак баврия цичIав къакIулми. ЦIана гьарца шагьрулий, щархъаву бур мизитру. Миннуву лахьхьин буллай бур Исламрал аслу-гьанурду ва чак баву. Мизитравун гьан къашайманал буссар чак бувайсса гъанмаччами, гьалмахтал, дустал. Миннал кумаг бувантIиссар.

Ттун къащи шай мусуль-мансса инсан чак къабуллай, ягу къатIайлану буллай ушиву кIул шайхту. Хъиннува язухъсса ишну чIалан бикIай мусульмансса инсан цала даву, дуккаву ягу цайми багьантту сававну чакру лях личIан буллай ухьурча. Вай бакъассагу, халкьуннаву машгьурну бур цаймигу багьантту: «на хIадурну акъара», «айгуивхьуну кьабитан ччай бакъар», «на жагьилну ура, хъунав хьувкун булланна».

КIулну бикIияра, Кьиямасса кьини укунсса багьантту кьамул къабувантIишиву. Щища шайссар дакI дарцIуну учин, на вайксса шиннардий яхьунтIиссара, куну. Балики, хIакьинусса кьини оьрмулуву махъра-махъмур дикIан. БивкIулучIа жагьилмагу хъунав хьумагу личIи акъассар. Му бакъассагу, хъунав хьувкун чак буллай айивхьуманангу жаваб дулун багьантIиссар жагьилния шинмай къабувну ливчIсса чакурдихлу. Мукун ливчIсса бухьурча, мигу хъирив лахъан буван аьркинссар.

Аллагьнал кумаг буваннав жуйва ялув бумур биттур буллан, Кьиямасса кьинисса хIисаб-суал бигьану гьаннав. Амин!