Зума дургьуманал буван хъинмур ва къахъинмур

Желательные и нежелательные действия при соблюдении поста в месяце Рамадан

Зума дургьуманал буван хъинмур ва къахъинмур
Зума дургьуманал буван хъинмур ва къахъинмур

Зума дугьайсса инсаннал кIюрххицIунсса дукаву суннатссар, къадуркуна дугьавунияр, цуксса чансса дукарчагу, хIатта ца ххув щинал учирчагу. Агьлул китабрал зумалулгу жулла зумалулгу дянивсса личIишиву мунийнур дусса. Махъ дукавугу суннатссар хьхьичIнияр, чани дуккаврищал къадагьарча, чани дукканнин чансса хьхьичI дуркуну. КьацIливу зад дуна чани дуккарча, мугьлат бакъа кьатIув личинссар.

Мукунма щарссанил ялув шариаьт буллай уна дуккарчагу мугьлат бакъа учIанссар. Мукун буварча му зума дурусъссар. Чани дуркривав, къадуркривав тIий щак хьурчагу, къадукаву хъинни. Махъ дуккарчагу зарал бакъассар. Баргъ лавгшиву мяйжан шайхту зума ритавугу суннатссар махъ ритавунияр. ХIатта чак буваннин за дукавугума хъинссар. Чассагуй ритавугу суннатссар. Му бакъахьурча щинай хъинссар. Амма ва заманнаву щинай ритаву суннатссар. Мунияр шубгьа бакъасса, хIалалсса хъус дакъатIий.

Зума дитайний:

«Аллагьумма лака сумту ва аьла ризкьика афтIарту» учаву хъинссар.

اللَّهُمَّ لَكَ صُمْتُ، وَعَلى رِزْقِكَ أفْطَرْتُ

«О Аллагь, ради Тебя я постился и дарованным Тобой пропитанием разговелся»

Риртукун лирчIумур хъирив лахъан чIярусса дукра дукавугу карагьатссар. Цама зума дургьусса инсаннан зума ритансса зад дулавугу суннатссар. Мунал дургьусса зумалул чириксса чири зад дуллунангу бикIайссар. Зума дургьусса адиминал кьуру бизаву, оь бищаву, ахттая махъ сивак дуккаву, хIаммамравун уххаву, чIявусса шанашаву къахъинссар. Шагьватрай хъанних ургаву, ппай тIий щарссанищал хъярчмахсара буллалаву – хIарамри. Дукансса ккюхIаву, ккухIанну ккюхIаву, кьункьув, зумув щин ларсун хъиннура гивуннай диян даву карагьатри. НяхIусса кьанкь дусса задрайн ссунтI учаву карагьатри.

Щялмахърай, гъибатрай, мюнпат бакъасса, оьккисса каламрая маз бурувччуну икIаву хъинссар. Цайми-цайми хIарамсса, карагьатсса иширттаяту урувччуну икIаву хъинссар. ДачIра зад къадукаву къагьассар. Гьарца базугу оьккисса задирттаяту буруччин ялувссар. Циксса халкьри зума дугьаврияту бачIва ккашил шавугу, мякьшавугу бакъа чири хIасул къашайсса! Цахьва цама карагьатсса калам буллай гъалгъа тIисса ухьурчагу, на зума дургьуну ура куну мунаяту арх хьунссар.

"Насихlатул аьвам" ("Гьунчlукьатlан") луттирава