МахIиялул мюнпатрая

МахIия (боярышник) хъинну дарувсса ххяххия дур. Муниву буссар витаминну А, К, С, Е, В. Буссар цайми ахъулссаннуву бакъасса даруртту, масала, урсоловая кислота. МахIия къюкIлин ва нервардан бакъа чара бакъасса дарман хъанай бур. Муния къюкIлин мюнпат бушиву халкьуннан ттуршрахъул шиннардил хьхьичIва кIулну бивкIун бур.

МахIиялул мюнпатрая
МахIиялул мюнпатрая

МахIия дикIайссар кIива журасса: лухIисса ва ятIулсса. ЯтIулмур хъиннура дарувссар. Ванил ахъулссаннуву ва тIутIаву бур инсанннал чурххан хъунмасса хайр. МахIиялия бувайсса бур къюкIлил диялдакъашиврунсса, оь сукку шавринсса (давление), шанубакъашиннарансса ва мукунма бугьарасса инсантурал оьттул зузаву ххуй дувансса даруртту. МахIиялул кумаг бувайсса бур атеросклероз хьусса инсаннан. Вания дувайсса дур настойка ягу отвар, ккаккан дурсса чIумуй хIачIан. Ялагу вания бувайсса бур кардиовален тIисса дару.

Атеросклероз – му дур инсаннал чурххавусса туннурду кьянкьа бувайсса, гай чапал буллай, къюкIлил зузаву захIмат дуллалисса азар. Му азар хъин дуван кумаг хьуншиврул дувайссар махIиялул отвар. Ласайссар шанна хъун къусса махIиялул ккузрал. Миннуйн дутIайссар дачIи литIра щаращисса щинал. Яла 1-2 ссятрайгу диртун, дутIайссар цамур тIахIунттувун. ХIачIлан аьркинссар 150 мл кьинилун 3-лла, дукра дукан 30-ра минутIрал хьхьичI. Атеросклерозран бакъасса, ва отварданул ялагу кумаг бувайссар лахъсса давление душивруя, стенокардиялияту, шану бакъашивруя, къюкI ришлашаврия, бакI гьанагьаврия. Ванил курс бувайссар ца зуруй.

Мунияр махъ 10-14 гьантлува ялагу тикрал бувайссар. Му куццуй, ца шинал мутталий 7-8 курс буван бучIину бур. МахIия къахъинссар лякьлуву ягу ккуккулий оьрчI бусса хъаннин. Мукунма, ца кьинилул мутталий махIиялул 150 грамраяр ххишала дуркуну къахъинссар тIар.

Аллагьнал кумаг буваннав!