Ислам марцIшиврийн оьвтIутIиссар

Религия ислам призывает к чистоте как духовной так и к физической. Какое место занимает физическая чистота в Исламе?

Ислам марцIшиврийн оьвтIутIиссар
Ислам марцIшиврийн оьвтIутIиссар

Ислам марцIшиврийн оьвтIутIиссар

Какое место занимает физическая чистота в Исламе?

КьюлтIсса зат бакъар, Ислам инсаниятрайн оьвтIий душиву марцIшиву дуруччин. МарцIшиву цIуллушиврул гьанур.

МарцIшиврул ца яла агьаммур шартI хъанахъиссар дукра канай айишин хьхьичI кару шюшаву. Амма ва къазахIматсса иш ца-ца чIумал оьрчIан бакъасса, хъуниминнангума захIмат бизлан бикIай. Гьарцаннал къадай ва чIирисса шартIирах къулагъас.

Ссанни му аьркинсса?

Цалчин, ва жунна цинявннангу чара бакъасса шартIри, жула яруннин къачIалачIисса чапалшиврия марцI хьуншиврул.

КIилчингу ва суннатсса ишри, му суннатсса иш хIисаврай биттур буварча, АллагьначIа бучIи лякъайссар.

Жунма дакIнийссар – мюрщиний кьатIату анавархъиндарай бувкIун, найбуна ссупралух щябикIайсса. Амма ниттил жува гьужум бувну, тIайла буккайвав кару шюшин. Циван?

Дуссар чIярусса азарду кару къашюшаву сававну дияйсса. Чапалсса каруннай ппив шайссар азарду сукку дувайсса микроорганизмарду. Инсаннал чурххавун багьну миннуя лахъайссар хъунмурчIин хъин дуван захIматсса азарду.

Ва макьала ккалаккиминнайн оьвчин ччива, ва иширах баччибакъулшиву къадурну, вардиш бувара зула оьрчIру дукра дуканнин хьхьичI кару шюшлай, куну.

СияхIрайн бувну, кару къашюшаврийну лархъсса азарду сававну гьарца шинал щала дунияллий литIайсса бур миллион ва бачIиннуйн бивсса инсантал. Ва лап хъуннасса аьдадри! Вайксса инсантал бивкIулия бурувччуну бикIантIиссия, марцIшиву дуручлай бивкIссания. Цуксса хIайпнугу инсантуран бувчIин ччай бакъар кару шюшаврил ялувсса баччибакъулшиврийну цуксса нигьачIаву дуссарив цала цIуллу-сагъшиврун. Цавай тIурча кару къашюшлай бур цала курчIилшиврийну, ва шартIирая бусурманнахь 1400 шинал хьхьичIва Аллагьнал Идавс, саллаллагьу аьлайгьи ва саллям, бугу-буслай, му дуруччин оьвтIий ивкIхьурчагу. Идавсил, саллаллагьу аьлайгьи ва саллям, увкуну бур: «Барачат буссар дукралул хьхьичI ва дукра дуркуну махъ кару шюршуманай» – куну. («Сунанат-Тирмизи»).

Цамур хIадисрай увкуну бур: «Цала къатлуву Аллагьнал барачат ливккун ччиманал дукра дуканнингу, дуркуну махъгу кару шюшаван аьркинссар» – куну (Жамиул ахIадис).

«Дукра дуканнин кару шюшара» – тIий оьвтIутIисса плакатру лархъун дикIайссия совет заманнай гьарцагу столовыйлул чIирттайн, дукрадукан бувкIминнан дукралул хьхьичI марцIшиву дуруччин аьркиншиврия дакIнийн бутлай.

Экспертътал тасттикь буллай бур кару къашюршуну дукра дукаву сававну цукун нигьачIисса азарду лахъан бюхъайссарив – вабаъ (холера), пневмония, хъахъицIурцIал (гепатит), шяра, ОРВИ ва чIярусса цаймигу. ЮНИСЕФ-рал (ООН-далул Дунияллул Халкьуннал дянивсса оьрчIал хаварбакъасса иширттал фонд) сияхIрайн бувну, так ца диарея сававнугума гьарца шинал дунияллий литIайсса бур ххюазаруннийн бивсса оьрчIру. Вайннавасса бачIивагу ххассал буван бюхъанссия, агарда оьрчIал дукра дуканнин хьхьичI кару шюшайсса диркIссания. Ва иш сававну цуксса бала хъанай бурив ххал бувара инсаниятран, азарахъул оьрчIру литIлай бур. Мунияту Идавс, саллаллагьу аьлайгьи ва саллям, оьвтIий ивкIссар каруннил марцIшиву дуруччин.

Мичиганнайсса (США) паччахIлугърал университетрал аьлимтурал тасттикь бувну бур, анжагъ, дахьва 5 процент дунияллул халкьуннал шюшайсса душиврий дукра дукан хьхьичI кару. Дукра дукан хьхьичI кару шюшаврийну 50-60 процентрал лагь хьун бюхъайсса дусса дур ххюттулул лахъай азарду, гепатит А ва дизентерия ва 15-20 процентрал лагь хьун бюхъайсса дур грипп ва цаймигу лахъай азарду дияву. Канийсса ца кв. см. яшайсса бусса бур 1500 микроб ва ми бигьану багьайсса бусса бур чурххавун. Мунийн бувну зула цIуллу-сагъшиву дуруччаврил цIаний хъама мабитаванни ва къазахIматсса шартI оьрмулуву ишла дуллан – дукра дуканнин кару шюшаван.

Цила багьайкун марцI хьуншиврул аьркинссар кару шюшаван ссахIвандалущал 15 сек чан дакъа.