СалихIсса макI

Хороший, праведный сон. Что в Исламе говорится про сны? Можно ли рассказывать сны?

СалихIсса макI
СалихIсса макI

МакIру личIи-личIийсса дикIайссар. МухIаммад Идавсил, саллаллагьу алейгьи ва саллям, кIицI лавгун бур макI ккаккаврил цаппара журарду: «МакIру дикIайссар шанма журасса: инсаннавун ццахханну дутлатисса щяйтIаннул макI, дяхтта буруккин буллай ивкIмур хьхьурай макIра ккаккаймур ва Аллагьнаясса тIайласса макI» (Ибн Мажагь, Ибн ХIиббан).

ХIадисраву увкуну бур: «СалихIсса макI – Аллагьнаятури, мяъна дакъамур – щяйтIаннуяри» (аль-Бухари, Муслим).

Цукунни личIи дувайсса ххуймур ва оькимур макI? ТIайласса макI ккакканшиврул цири буван аьркинсса? ХьхьичIва-хьхьичI, дакIний битан аьркинссар Идавсил, саллаллагьу алейгьи ва саллям, увкумур: «ТIайласса макI ккаккайсар ихтилат тIайлану бувайманан (щялмахъ къабусайманан)» (Муслим).

Аьлимтурал тIимунин бувну, салихIсса макI ккаккайссар чаклин ивссуну утту ишайманан, хIалалсса дукра дукайманан, Аллагьнал цIа кIицI лаглай шанавун гьайманан. Вай шартIру биттур дурну утту ивхьуманан тIайласса, ххуйсса макI ккаккайссар.

Имам Нававил «Аль-Азкар» тIисса луттираву дур ххуйсса макI ккакканшиврул дуккайсса дуаь. МухIаммад Идавсил, саллаллагьу алейгьи ва саллям, щарссанил Аьишатлул رضي الله عنه утту бишиннин укунсса махъру учайсса бивкIссар:

«Аллагьумма инни асъалука руъя салихIатан, садикьатан гъайра казибатин нафиаьтан гъайра зарратин».

اللَّهُمَّ إِنِّي أسألُكَ رُؤْيا صَالِحَةً، صَادِقَةً غَيْرَ كاذِبَةٍ، نافِعَةً غَيْرَ ضَارَّةٍ

Мяъна: «Я Аллагь, ттун ккаккан дува салихIсса, тIайласса, щялмахъ ягу зарал бакъасса, мюнпатсса макI».

Оьккисса макI ккаркманал куямур чулинмай шамилва пув-пувгу увкуну ва дуаь дуккирча хъинссар:

«Аллагьумма инни аоьзу бика мин аьмали щайтIани ва саййиатиль ахIлами фаиннагьа ла такуну шайъан» (Ибн ас-Сунни).

اللَّهُمَّ إِنِّي أَعُوذُ بِكَ مِنْ عَمَلِ الشَّيْطَانِ، وَسَيِّئَاتِ الْأَحْلَامِ، فَإِنَّهَا لَا تَكُونُ شَيْئًا

Мяъна: «Я Аллагь, на уручча щяйтIаннул тIуллая ва оьккисса макI ккаккаврия, мяйжаннугу миннул цукунчIавсса мяъна дакъассар».

ЩяйтIан бахкъачиншиврул утту ишайни каруннавун «Аятул-Курси», «Кьулгьу», «Фалакь», «Нас» бувккуну, щала чурххайх ках учаву хъинссар.