То что увеличивает твой удел

Хъус-маэшат гьарза шаврил сававру

Хъус лякъаву ва маэшат баву ва дунияллий гьарца инсаннан аьркинсса задру дур, ми лякъиншиврул ва жула кулпатру гьарзад аьркинмунил щаллуну бикIаншиврул ишла дувару жура-журасса кьяйдарду.

Бусурманчувнал дин-эбадат щаллуну дуван дахчаймурну хьун бюхъайссар мискиншиву, цанчирча, ккаши ва кьянатшиву дусса инсаннал пикрирду бикIантIиссар цалва кулпатрал дуканмунил ва лахханмунил бувгьуну. Мунияту, гьарца инсаннал буржри цувагу цала кулпатгу хIалалну ляркъусса хъуслил ва дуки-хIачIиялул щаллу баву.

Буссар Кьуръандалул аятру ва МухIаммад Идавсил [саллаллагьу алейгьи ва саллям] хIадисру жухьва бусласисса бусурманчувнал хъус лякъаву бигьа дувайсса куц, амма жува ми хъинну чанну ишла бувару.

Кьуръан буккаву

ХьхьичIва-хьхьичI, маэшат ххуйну бачаврил савав хъанахъиссар къатлуву Кьуръан чIявуну буккаву. Идавсил [саллаллагьу алейгьи ва саллям] хIадисраву увкуну бур: «ЧIявуну Кьуръан буккайсса къатлуй барачат бишайссар», - куну.

Цамур хIадисраву увкуну бур: «Чанну Кьуръан буккайсса къатлуву барачатгу чанссар», - куну. Утти пикри буван аьркинни, Кьуръан бувагу къабуккайманал къатлуву цукунсса барачат бикIанссар?! Мукунсса къатлул агьлугу личIи-личIисса захIматшивурттавун багьлан бюхъайссар. Ялагу, мукунсса къатлуву малаиктал чанссар, щяйтIант чIявуссар. Амма жунма щак бакъа кIулну бикIан аьркинссар, буккайсса Кьуръандалул аятру ва сурарду тIайлану, махраджрай буккин аьркиншиву.

ЦIанасса чIумал тIайлану Кьуръан буккин лахьхьин ччиманангу цукунчIавсса захIматшиву дакъар, гьарца шяраву мизитирттаву, мадрасарттай бур Кьуръан буккин ва чак буван лахьхьин бувайсса курсру. Хаснува гъинттул чIумал дуклаки оьрчIру кIичIиртту батлай занази къабувну, ми курсирдайн занази баву хъинни.

Сура «Аль-Вакьиаь»

Кьуръандалуву буссар 56-мур сура «Аль-Вакьиаь». Му буккаврия Идавсил [саллаллагьу алейгьи ва саллям] увкуссар: «Хьхьувай сура «Аль-Вакьиаь» буккайма мискиншивруя урувччуну икIантIиссар», - куну.

Мискиншиву къадияншиврул му сура чIявуну буккайсса бивкIссар асхIабтурал ва миннал хъиривсса табиинтурал. Жувагу «Аль-Вакьиаь» буккаварча хъинну хъинссар.

Кьуръандалувусса лахъисса сурарду буккин къакIулманал, гьарца чаклил хъирив дуккайсса азкардавух «Аятуль-Курси», «Кьулгьу», «Фалакь», «Нас» буккирча хъинссар.

Салават

АваданшивручIан гъан шаврил ялагу ца кIула – Идавсин [саллаллагьу алейгьи ва саллям] салават дутавури. ХIадисраву увкуну бур: «Кьуръан буккайманал Аллагьнайн щукру буллалиссар, салават дутайманал щаращуя нанисса щин кунна барачат ласласиссар».

Цамур хIадисраву увкуну бур: «Вила щалла чIун салават дутлай гьан дува, вил бунагьру шюшинтIиссар, ва дакIнивату дардру дуккантIиссар».

Салаватрал яла кутIамур ва жунна цинявннан кIулмур журагу: «Аллагьумма салли аьля сайидина МухIаммадин ва аьля али сайидина МухIаммадин ва саллим».

КIюрххицIун чIун

Цалва хъуслий барачат бивхьуну ччисса инсан кIюрххил чак бувну махъ, баргъ гьаз хьуннин махъунай утту къаишинссар. Имам АхIмадлул бувсъсса хIадисраву увкуну бур: «КIюрххил чак бувну махъ утту ишаврил хъуслия барачат ласайссар» - куну.

Цамур хIадисраву Идавсил [саллаллагьу алейгьи ва саллям] куну бур: «Ттул умматиннал барачат кIюрххицIун чIумуву буссар».

Бусурманчувнал балагь хъанахъиссар хьхьувай махъ утту ивхьуну, яла ахттайнин шанай, хьхьу ва кьини хIала духхан даву. Мукунсса низам инсаннал чурххал цIуллушиврунгу заралссар. ХIакьинусса кьини наукалул тасттикь бувну бур хьхьувай ссят 10-нния кIюрххилнин инсаннал няраву чурх цIу лаган бувайсса ва жагьил бувайсса зад шайшиву. Му манзилдануву инсан шанай акъахьурча, му зад къадуккайсса дур.

Утту ишаврил низам зия хьуминнал онкологиялул цIуцIавуртту шаврил нигь хъиннура хъуннассар тIийгу бур. Жулва буттал-буттахъал ми цIуцIавуртту къашайсса дикIаву махIатталсса иш бакъар, цанчирча гай кIюрххил чани хъя-хъя тIисса чIумал цала давурттайн буккайсса бивкIунтIий.

КIюрххил чак бувну махъ утту къаишинсса гуж бикIаншиврул, хьхьувай хъатIан чак бувну махъ, лахъи къалавгун утту ишин аьркинссар. Мукун баву Идавсил [саллаллагьу алейгьи ва саллям]  суннагу хъанахъиссар, му чIумалсса шанна ссятрай лавхъсса шанул 70% багьтIатI шаврил лагайссар. Амма жулламур хасият дур хъатIан чак бувну махъ хаварду буслай ягу телевизордах буруглай щябикIайсса. Цукун шайссар му чIумал кIюрххил чаклин чIумуй бизан, хаснува хьхьу кутIасса гъинттул чIумал.

Идавсил [саллаллагьу алейгьи ва саллям] увкуссар: «Халкьуннан кIулссания кIюрххил чакливусса ва хъатIан чакливусса барачат, ми чак буван ххярк тIийгума бачинссия».

Ялагу хIадисраву увкуну бур: «КIюрххил чак жяматрай бувма, хьхьувайнин Аллагьнал яувайссар, хъатIан чак жяматрай бувма кIюрххилнин яувайссар». Ца чIумал Идавсил [саллаллагьу алейгьи ва саллям] душ ФатIимат [разияллагьу аьнгьа] кIюрххил чак бувну махъ утту бивхьуну бур. Мунил чIарах нанисса Идавсил [саллаллагьу алейгьи ва саллям] увкуну бур: «Бизу, ттул душ! Аллагьнал цала лагъартуннан хъуслил бутIри бачIлачIисса чIумал машанарда, баччибакъашиву мадувара. Аллагьнал цала лагъартуннайх маэшат бачIайссар чани хъя-хъя куну, баргъ гьаз хьуннин».

Алжаннул мурхь

Ца ялагу маэшат гьарза бувайсса куц – кулпатрал чулухунай чумартну, сахаватну икIаву. ХIадисраву увкуну бур: «ХIакьну, дунияллул хъуслил кIулли Аллагьнал Цала лагънан мийксса гьан дайссар, инсан цала кулпатрал чулухунай цуксса чумартну урив, циксса харж дуллай урив».

Цала щарссанил ва оьрчIал чулинай сахаватшиву дувайманачIан Аллагьнал чулухатугу сахаватшиву дикIайссар. Мукунманан Аллагьнал тIитIайссар маэшатрал ххуллурду. ХIадисул-кьудсилуву Аллагьнал увкуну бур: «Ина харж дува, На вийн харж дуванна». Кулпат кьянатну бунува, цалва дустуращал кайп буван харж дувайманал хъуслий ва маэшатраву барачат къабикIантIиссар.

Идавсил [саллаллагьу алейгьи ва саллям] увкуссар: «Сахаватшиву – Алжаннул мурхьри, мунил къяртригу ва дунияллуву дуссар. Му мурхьирал къяртри дургьума Алжаннавун уххантIиссар. Мяшшиву – дуржагьрал мурхьри, мунил къяртри дургьума дуржагьравун уххантIиссар».

Ххуйсса хасият

Бусурманчувнал тааьнсса хасият духьурча, мугу хъанахъиссар хъус-маэшат чIяву шаврил савав. ХIадисраву увкуну бур: «Хъинсса хасият, цаманан зарал биян къабаву – маэшат гьарта бавури. Инсантал куннащал ку ххуйну бухьурча, куннан куннал зарал буллай бакъахьурча, Аллагьнал миннан аваданшивручIансса ххуллурдугу гьарта бувантIиссар».

Аманат

МухIаммад Идавсил [саллаллагьу алейгьи ва саллям] хIадисраву увкуну бур: «Аманат – аваданшивури». Аманат дурсса зад ядувайманал хъуслий барачат бишинтIиссар, хиянатшиву дувайманайн кьянатшиву диянтIиссар.

Цамур хIадисраву увкуну бур: «Ца миллатрал оьрмурдай ва хъуслий барачат бишин ччисса чIумал, Аллагьнал миннан дулайссар чумартшиву ва нач-хIая. Ца миллатрая барачат ласун ччисса чIумал Аллагьнал миннайн гьан дувайссар мяшшиву ва хиянатшиву». Мунияту, жунмагу лахьхьин аьркинни жуйнма бувсса аманатру биттур буван, ва вихшала дуван лайкьну бикIан.

Кулпат баву

Бусурманчув авадан увайсса цамургу савав – кулпат бавури. Идавсилгу [саллаллагьу алейгьи ва саллям] увкуну бур: «Аваданшиву тIалав дувара кулпат бувну». Аллагьнахлуну марцIсса ниятращал, бунагьрая урувччуну икIан, МухIаммад Идавсил [саллаллагьу алейгьи ва саллям] уммат чIяву буван щарсса дуцайсса инсаннан Аллагьнал чара бакъа кумаг бувантIиссар.

Кьуръандалувугу увкуну бур: «Зу кулпатру бувара! Кулпат бувайми мискинну бухьурча, Аллагьнал ми авадан бувантIиссар цала сахаватшивруйну» (Сура «Ан-Нур», аят 17).

Ца чIумал ца асхIаб Идавсихь [саллаллагьу алейгьи ва саллям] цIухлай ивкIун ур, на мискинну ура, ци бави, тIий. Идавсил [саллаллагьу алейгьи ва саллям] увкуну бур: «Щарсса дуци, Аллагьнал кумаг бувантIиссарча», - куну.

Цамур хIадисраву увкуну бур: «Шама инсаннан Аллагьнал чара бакъа кумаг бувантIиссар: Аллагьнал ххуллий жан харж дуван увкма, бунагьравун къаагьан кулпат бувма, ва цала цува залуннаща машан ласун зузисса лагъ».

Аллагьнал жунма кумаг баннав Заннал амрурдайн мютIину бикIан, хIалалсса хъус лякъин тавфикь булуннав. Амин!

Ас-Салам кказит.