Нюжмар дуван ччива мащилул ардай
Стихотворение на лакском языке про родной край
Патимат Рамазанова
Нюжмар дуван ччива мащилул ардай
Чантl учин ччива ттун ца кьини кlюрххил,
Ссурхlиял дазуцlсса магьлул мащилий,
Оьллугу ттивзуну дуркlсса буттарссил,
Гъили накlлил оьрту
чlарав бишайний.
Дюхлулул ках тlисса
чlапlал щурщулий,
«Накlлия ххув уча!» миннат бувайний,
Аьтрилул аьнттуву ладиркl мащилий,
Телефонну, сетьру, вай-фай дакъаний.
Зунзулчаннал тlинтту зунттал ланттая
Хьхьем датlлай хlаллицlух ланцlа тlутlиний,
Бизанттай, рахlаву, ратlув, лагмава
Чlелмултрал хор дакъа
чlу-чlитl бакъаний.
Щюллисса хьхьемаву ччаннугу шюшлай,
Паммалул ттуруллал хъирив хъанайний,
Нюжмар дуван ччива мащилул ардай
Мурчайн лажин дугьлай, бизанттайн лахълай.
Бизанттайн лахъайхту лихъайхха дардру,
Уртту-тlутlай чlалай оьрчlи бузмарду,
Шанчlапlал щатlава бакlру гьаз дурну,
Някlсса чани кlучlай някlуннаралгу.
Бургъищал,
цlурттащал хаварду буслай,
Чlимучlалт хъачlунттай щябикlан битлай,
Ца нюжмар дан ччива мащилул ардай,
Илкиншиврул чухъа ликъаклай занай!
