Сси бивзсса чIумал

Аллагьнал лагънан сси бивзукун, цукунчIав къабучIиссар хIакьмунил ва тIайлашиврул дазурдава уклан. Му чIумал аьркинссар Идавсил, саллаллагьу аьлайгьи ва саллям, увкумунил хъирив ачин: «Сси бивзма кьаагьну икIуча!». Сси бивзукун чаклин иссаву дуван аьркинссар, цанчирча, сси цIараха лавхьхьуссар – щинал му лещан бувайссар. Мукун буван аьркиншивугу Идавсил, саллаллагьу аьлайгьи ва саллям, бувсъссар.

Сси бивзун, кIири ивчуну гьалак увксса инсан нигьачIий икIан аьркинссар му тагьарданул цайра аьй-бювкьу дувансса ягу бунагьсса кIанттайн къаутан. Цанчирча, мукунсса тагьарданул ахир пашмансса хьуну, тIайлашиврул ва инсапрал дазурду лиян бюхъайссар. Мукунманал дакIний битича Идавсил, саллаллагьу аьлайгьи ва саллям, махъру: «Шанна хасият дуссар инсан ххассал увайсса, шанна дуссар гьалак увайссагу. Ххассал увайми: кьюлтIну ва аьлттуну (халкьуннал дянив ва цувалусса чIумал) Занная нигьа увсун икIаву, сситтувугу паракьатнийгу тIайласса бакъа махъ къаучаву ва аваданшиврувугу мискиншиврувугу щукрулий икIаву. Гьалак увайса хасиятру: мяшшиврийн мютIий шаву, гьавасрал хъирив ачаву, цаява цува хIайран шаву». 

Ялув чивчумунил хIасил

Аллагьнал лагънан аьркинссар цала хасият Заннал хасиятраха лащан дулла. Мунил хIакъираву МухIаммад Идавсил, саллаллагьу аьлайгьи ва саллям, увкуссар: «Аллагьнал хасиятру зуннагу ласияра». Аллагьнан Цала цIаний сси къабизайссар, мунияту инсаннангу аьркин бакъассар цала цIаний сси бизаван ягу кьисас ласлан. Цанчирча, Аллагьнан Цала цIаний сси бизайсса бивкIссания, мугьлат бакъа щала махлукьат гьалак буванссия.

«СалихIминнал тIабиаьт»
тIисса луттирава