Как сберечь свое имущество?

Аллагьу Тааьланал щалвагу мусульманнал уммат ца кулпат кунмасса умматну хьун бувссар.

Имам Муслимлул бувсъсса хIадисраву увкуну бур:

«Мусульманчув мусульманчувнал уссури, мунай зулмугу къабувантIиссар, хиянатшивугу къадувантIиссар. Цала уссин кумаг бувайманан Аллагьнал кумаг бувантIиссар. Мусульманчув ца захIматшиврува уккан увма Аллагьнал Кьиямасса кьинилул захIматшиврува уккан антIиссар. Мусульманчувнал диялдакъашивуртту кIучI дурманал диялдакъашивуртту Аллагьнал Кьиямасса кьини кIучI дантIиссар», – куну. 

Жунма бувчIин аьркинссар динналувусса уссушиву оьттуйнусса уссушивунияр даражалул ларайсса душиву. Цанчирча, оьттуйнусса гъаншиву ниттибуттайхчIин дикIайссар, динналулмур гъаншивурив Аллагьнал  Кьуръандалуву цIакь дурссар.

МухIаммад Идавсилгу [саллаллагьу алейгьи ва саллям] увкуссар:

«Нагу ттул умматгу лавхьхьуссар буттаха ва ганал оьрчIаха». Цамур хIадисравугу увкуну бур: «Мусульманнал ялун дирсса захIматшивурттая ургъил къабайма миннавасса акъар», – куну.

Вай бакъассагу буссар чIявусса хIадисру, мусульманнай аякьа дан жуйнма оьвтIисса. Цала динналул уссил чулухуннай баччи бакъашиву даву – иман хьарасса душиврул лишанни. Закат буккаврил ца хIикматшивугу хъанахъиссар жува чIаравманаха къулагъас дуну, ганай аякьа дуллай бикIаву. Закат тIисса махъ аьрабрая таржума барча, мунил мяъна хъанахъиссар «марцIшиву» – закатрайну инсаннал цала хъус марцI дуллалиссар.

Ялагу ца му мукъул мяъна – «гьарзашиву, зиядашиву» - закат буккаврийну мусульманчувнал цала хъус гьарза дуллалиссар. Закат буллай унутIий мискин хьусса цаягу инсан акъассар. Му бакъассагу, закат къабуккаймири гьарзад духларгун личIан бюхъайсса.

Закят

Закат буккаврийну цува марцI шаву дакъасса, мискинсса динналул уссин кумаг бавугу хъанахъиссар. Халиф Оьмар бин Аьбдулаьзизлул заманнай ганал халифатраву ца шинал закат булунсса инсан къалявкъуну, мий закат цамур кIанттайн гьан буван багьссар, му бурж цинявннал багьайкун биттур бивкIунтIий. Бюхъай цIуххин циванни на закат булун аьркинсса, ттула захIматрайну ляркъумур щинчIав дулун циван аьркинссар, куну.

Цамур куццуй учин, вил хъус так ца вилла дакъар. Муниву буссар миски-гъаривнансса бутIагу. Мунин бувну, закат къабулайманал га мискинчувнай зулму буллалиссар. ХIадисраву бувсун бур, Кьиямаса кьини инсан учIантIиссар тIар зунттурдуксса чIявусса хъинсса аьмаллащал, нава чара бакъа Алжаннавун гьанссара тIий икIантIиссар тIар. Микку бучIантIиссар тIар мунал зулму бувмий, масала, цаннахь оьккисса махъ увкусса, ваманах ххуй акъа урувгсса, гаманан закат къабуллусса, ми бучIантIиссар мунаща цалва хIакь ласун. Му хIакьгу хъанахъисса мунал хъинсса аьмаллу, цукунчIавсса арцу-мусийну кьимат бищун къашайсса. Багьа бищун къашайсса хъус зеххинтIиссар Кьиямасса кьини закат къабуккайманая. Цири мунан яла хьунтIисса? БухлагантIиссар хъинсса аьмаллу, амма тIалав буллалимий ялагу личIантIиссар. Яла гайннал цалва бунагьру ванайн бичинтIиссар, ласунсса цичIав къаляркъукун. Ахирданийгу чирилул зунттурдан кIанай бунагьирттал зунттурду хьуну личIантIиссар, цувагу дуржагьравун утантIиссар.

Мунияту, пикри буван аьркинссар, хъус хIакьину дур, гьунтти дакъар. Жулва бакIрачIан ци бучIантIиссарив щинчIав къакIулссар. ХIакьину жува аваданну буру, гьунтти бюхъайссар жучIара хъус къаличIан. Мунин бувну, бюхълай бунува щукру буллан аьркинссар садакьа баврийну, закат буккаврийну.

Аллагьнал тавфикь булуннав! Амин!