ЩяйтIан гъан хьун къабитаймур

Инсанная оьмур арх бувайсса дуаьрдал ягу малаиктурал бакъарча, так ца Аллагьналли. Дуаь-эбадатру мунинсса сававру хъанахъиссар. Мунияту, жува гьарца чIумал Заннал хьхьичI дакI марцIну бикIан аьркинссару.

Инсаннан Аллагь хъама ивтсса чIумал щяйтIан дакIнивун бигьану буххайссар. Кьуръандалуву увкуну буссар (мяъна): «Аллагь кIицI лагаврил ххуллия авккуманал чIарав щяйтIан бацIантIиссар, мунал дус хьуну» («Аз-Зухруф» суралул 36-мур аят). 

Муниятури хIарачат буллан аьркинсса шайкун чIявуну Аллагь кIицI лаглан, гьарца ишираву дуккайсса дуаьрду (азкарду) ккалан.

Имам Муслимлул луттиравусса хIадисраву увкуну бур (мяъна):
«Чаклийн оьвтIисса чIу (азан) баярча, щяйтIан лихъайссар, гьавагу ита бакьлай, акбарданул чIу цинма къабаяншиврул. Акбар увкуну къуртал шайхту махъунмай зана шайссар.

Мукунма арх шайссар икьаматрал чIу баярча. Амма ялагу махъунмай бувкIун, инсаннал дакIнивун личIи-личIисса пикрирду буххан буллан бикIайссар, чак булланнин дакIний къабивкIмур дакIнин бутайссар, чаклил цими ракааьт дурссарив хъама битаншиврул».

ЩяйтIаннуя бурувччуну бикIаншиврул дуккайсса дуаь дур имам ТIабаранил луттираву. Ца инсаннал цIувххуну бур АьбдурахIман ибн Ханбашлухь [разияллагьу аьнгьу]: «МухIаммад ИдавсичIан [саллаллагьу аьлайгьи ва саллям] щяйтIант гъан шайхту ганал ци байва?» АьбдурахIманнул [разияллагьу аьнгьу] бувсун бур:

«ИдавсичIан [саллаллагьу аьлайгьи ва саллям] бувкIуна кIани-кIанттаяту тамансса щяйтIант. Гайннавасса цаннил канихь лархъсса цIу дия, Идавс [саллаллагьу аьлайгьи ва саллям] ччуччин уван кьасттирай ларсун бувкIсса. 

Гай ккаккайхту МухIаммад Идавс [саллаллагьу аьлайгьи ва саллям] махъу-махъунай хъанан ивкIуна. Микку Жабраил малаик увкIун укунсса дуаь лахьхьин дуруна:

“Аоьзу бикалимати Ллагьи т-таммати л-лати ла южавизу-гьунна баррун ва ла фажирун мин шарри ма халакьа ва зара-а ва бара-а, ва мин шарри ма янзилу мина-ссамаи ва мин шарри ма яъружу фигьа, ва мин шарри ма зара-а филь-арзи, ва мин шарри ма яхружу мингьа, ва мин шарри фитани л-лайли ва н-нагьари, ва мин шарри кулли тIарийкьин илля тIарийкьан ятIрукьу би-хайрин, я РахIман!”

Вай махъру учайхту Аллагь Тааьланал лещан дуруна щяйтIантрал цIу ва ми циняв бухлаган бувуна».

Мукунма, Анаслул [разияллагьу аьнгьу] бувсун бур Идавсил [саллаллагьу аьлайгьи ва саллям] увкушиву:

«Къатлува увккун нанисса чIумал

“Бисми-Ллягьи таваккалту аьля-Ллагьи ва ля хIавля ва ля кьуввата илля би-Ллягь”

увкуманахь малаикнал учинтIиссар: “Ина оьмуния ххассал хьунтIиссара, урувччуну икIантIиссара, тIайла-бацIу хьунтIиссар”. Му инсаннаяту щяйтIан арх хьунтIиссар» (Абу Давуд).

ЩяйтIаннуя буруччиншиврул «Аятул-курси», «Фалакь», «Нас» бувккунугу хъинссар.

Мудан чаклин ивссуну икIан хIарачат буваймагу уруччайссар щяйтIаннуя.

Шиккува учин, циксса дуаьрду ккаларчагу, багьу-бизу, тIуллу ххуйсса дакъахьурча, дурккусса дуаьрдая мюнпат чанссар.